20th Century Fox hefur látið þau boð út ganga að sjöunda Planet of the Apes-myndin, sem kemur til með að heita Dawn of the Planet of the Apes, verði frumsýnd 23. maí 2014.
Síðasta innslagið í kvikmyndabálknum, Rise of the Planet of the Apes, kom í fyrra og fékk góðar viðtökur áhorfenda og gagnrýnenda. Þá halaði myndin hátt í hálfan milljarð dala á heimsvísu.
Leikstjórinn Rupert Wyatt, sem sýndi vönduð vinnubrögð í Rise of the Planet of the Apes, hefur verið ráðinn á ný til þess að leikstýra framhaldinu. Mönnum þótti 20th Century Fox tefla ansi djarft þegar Wyatt fyrir treyst fyrir jafn vinsælum bálki og Planet of the Apes en hann hafði þá einungis leikstýrt einni kvikmynd.
Kamelljónið Andy Serkis snýr aftur í hlutverki apans Caesar en óvíst er hvort James Franco eða Freida Pinto muni endurtaka hlutverk sín úr fyrri myndinni. Nýlega valdi Svarthöfði Rise of the Planet of the Ape einn af fimm bestu forleikjum kvikmynda í tilefni frumsýningar Prometheus. Lesa má listann hér.
Dawn of the Planet of the Apes verður frumsýnd 23. maí 2014.
