Aðstandendur hins umdeilda framhalds af snilldarmynd Martins Scorsese, Raging Bull frá árinu 1980, hafa látið undan kröfu MGM og hafa breytt titli nýju myndarinnar úr Raging Bull II í The Bronx Bull. Þá fallast þeir á að slíta á allar tengingar við Raging Bull. Að þessum skilyrðum uppfylltum fellst MGM á að falla frá lögbannskröfu á gerð og sýningu myndarinnar.
The Bronx Bull mun vitaskuld eftir sem áður segja sögu hnefaleikarans Jake LaMotta eftir atburði Raging Bull enda byggir handrit framhaldsins á bók sem LaMotta skrifaði eftir að Raging Bull var frumsýnd.
Robert De Niro lék LaMotta með ótrúlegum tilþrifum undir stjórn Scorsese en í nýju myndinni fer William Forsythe með hlutverk LaMotta á efri árum og Mojean Aria leikur boxarann ungan.
Meistari Martin Scorsese kemur vitaskuld hvergi nærri verkefninu og segir myndina tilgangslausa; „Ég tel að við höfum sagt allt sem þurfti að segja á sínum tíma.“
