Sýnishorn: Vélbyssurnar tala sínu máli í Gangster Squad
10. maí '12 11:38
Fyrsta sýnishornið úr glæpamyndinni Gangster Squad var frumsýnt í nótt og má sjá það hér að neðan.
Einvala lið leikara er í myndinni með Ryan Gosling, Josh Brolin, Emmu Stone og Sean Penn í fremstu víglínu. Leikstjóri myndarinnar er Ruben Fleischer sem hefur meðal annars leikstýrt gamanmyndunum Zombieland og 30:Minutes or Less. Í öðrum hlutverkum eru ekki ómerkari menn en Giovanni Ribisi, Nick Nolte, Michael Pena, Robert Patrick og Anthony Mackie.
Gangster Squad gerist á fimmta áratugnum í Los Angeles þegar glæpakóngurinn Mickey Cohen, sem drottnar yfir austurströnd Bandaríkjanna, ætlar sér að hreiðra um sig meðal stjarnanna í Hollywood. Hópi lögreglumanna er fengið það verkefni að halda aftur af Cohen en það reynist hægara sagt en gert þar sem Cohen er með vænan slatta af stjórnmálamönnum í vasanum.
Sýnishornið bendir til þess að stíll myndarinnar sé svo sannarlega öðruvísi en gengur og gerist í myndum um menn af sauðahúsi Cohens enda er valið á Fleischer sem leikstjóra óneitanlega dálítið sérstakt þar sem um gangster-mynd er að ræða. Forsmekkurinn bendir til þess að útkoman verði mögnuð og það verður áhugavert að sjá hvernig Fleischer afgreiðir krimma horfinna tíma.
