A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Before the Devil Know You're Dead | Kvikmyndavefurinn Svarthöfði

Úr bunkanum: Before the Devil Know You're Dead (2007)

21. maí '12 11:57 Before the Devil Know You're Dead

„Áhugaverður söguþráður, samtöl og mannlegar persónur, ásamt magnaðri frammistöðu Hoffmans og Finneys, drífa þessa litlu kvikmynd áfram.“

Tveir bræður grípa til þess örþrifaráðs að ræna skartgripaverslun foreldra sinna og auðvitað endar þetta með því að allt sem getur farið úrskeiðis fer úrskeiðis.
 

Leikstjóri Before the Devil Knows You're Dead, reynsluboltinn Sidney Lumet, var enn í fullu fjöri þegar hann gerði myndina en hann á að baki rúmlega fjörutíu myndir, fimm tilnefningar til Óskars verðlauna og eitt stykki heiðurs Óskar fyrir framlag sitt til kvikmyndalistarinnar. Þrátt fyrir það gerði hann hnefafylli af lélegum kvikmyndum á ferlinum en er engu að síður einn af mínum uppáhaldsleikstjórum vegna þess hversu fjölbreytt höfundarverk hans er. Meðal hans bestu mynda, og meistarastykkja eru The Verdict, Network, 12 Angry Men og Dog Day Afternoon.
 

Leikstjórn Lumets og meðhöndlun hans á handriti Before the Devil... er mjög góð og honum tekst að halda góðri fléttu, sem endar með kröftugu uppgjöri, gangandi. Örþrifaráð þeirra bræðra í Before the Devil... er mjög trúverðugt og gerir framvinduna afar spennandi. Atburðarásin stekkur fram og aftur í tíma sem gerir myndina mjög ófyrirsjáanlega og áhugaverða og þá sérstaklega að því sem snýr að hliðarsögu persónu Alberts Finney sem leikur föður drengjanna.
 

Það er hreint ótrúlegt að fylgjast með Philip Seymour Hoffman í hverri óskarsframmistöðunni á fætur annarri. Hoffman er magnaður Andy Hanson sem er heilinn á bak við ránið. Sama ár og Before the Devil... var frumsýnd fékk hann óskarstilnefningu fyrir hlutverk sitt í Charlie Wilson’s War, og satt best að segja þá er hann ekki síðri í Before the Devil... Ethan Hawke leikur bróður Hoffmanns og er einnig góður í hlutverki sínu. Gamla brýnið Finney er afar sannfærandi sem ekkillinn sem vill leita uppi þann sem stóð að baki ráninu og eru eftirmálar ránsins átakanlegir fyrir persónu Finneys, sem hann túlkar á yfirvegaðan og vandaðan hátt.
 

Before the Devil Knows You’re Dead er virkilega góð og vönduð mynd sem hægt er að mæla sterklega með. Áhugaverður söguþráður, samtöl og mannlegar persónur, ásamt magnaðri frammistöðu Hoffmans og Finneys, drífa þessa litlu kvikmynd áfram.

Leikstjóri: Sidney Lumet
Handrit: Kelly Masterson
Leikarar: Philip Seymour Hoffman, Ethan Hawke, Albert Finney, Marisa Tomei og Amy Ryan



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða