A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Bullet to the Head | Kvikmyndavefurinn Svarthöfði

Í bíó: Bullet to the Head (2013)

8. febrúar '13 12:55 Bullet to the Head

„Það er óneitanlega B-mynda fnykur af Bullet to the Head, rétt eins og mörgum eldri myndum kappans hér á árum áður. Þeir sem sækjast eftir hasar, hamagang og þrútnum Stallone fá eitthvað fyrir hinn snúð.“

Tveir félagar og leigumorðingjar eru sviknir og annar þeirra er drepinn. Heiðarlegur lögreglumaður gengur til liðs leigumorðingjann sem eftir lifir til þess að hafa hendur í hári svikulu atvinnuveitenda leigumorðingjanna og fletta ofan af spillingu innan lögreglunnar.

Sylvester Stallone hefur á síðastliðnum árum átt aldeilis góða endurkomu með fjórðu Rambo-myndinni og The Expendables-myndunum tveimur. Rétt eins og með The Expendables er Bullet to the Head afturhvarf til hasarmynda níunda áratugsins þegar Arnold Schwarzenegger og Stallone drottnuðu yfir þeirri deild.

Gamla brýnið Walter Hill leikstýrir Bullet to the Head. Hann gerði garðinn frægan fyrir margt löngu með The Warriors og 48 Hrs. Hill þekkir hasarmyndir níunda áratugsins eins og handabakið á sér þess sjást víða glögg merki í fjölmörgum hasaratriðunum í Bullet to the Head þar sem heila- og blóðslettum frussast í allar áttir, eins og nafn myndarinnar gefur til kynna.

Sagan er á góðu róli sem gengur mestmegnis út á að stráfella þá sem standa í vegi Stallones. Að vísu var allt með aðstoðarkokkinn, lögregluna frá Washington, eitthvað óljóst og óhnitmiðað. Spillingin nær langa leið upp raðir pólitíkusa og lögreglunnar eins og vera ber í söguþræði sem þessum.

Stallone gæti leikið hlutverk leigumorðingjans í svefni. Allur þrútinn og æðaber lætur hann menn sem eru helmingi yngri hann finna fyrir því og slær á létta strengi milli átaka. Leikhæfileikar Stallones, eða öllu heldur handritsval, virðast takmarkast eingöngu við að lúskra á mönnum og er í sjálfu sér alveg í lagi. Hann gerir það vel en tekur sig kannski aðeins of alvarlega. 

Hinn kóreskættaði Sung Kang er úti á þekju alla myndina sem hjálparkokkur Stallones, lögreglan frá Washington, og er grútlélegur. Nákvæmlega engin tenging næst milli persónu hans og Stallones og þeir mynda afleitt teymi. Tröllið Jason Momoa er sá eini sem getur mögulega skákað Stallone og stendur sig vel í hlutverki sínu. Hvar og hvernig aðstandendum myndarinnar tókst að grafa Christian Slater upp fyrir myndina er mér hulin ráðgáta.

Það er óneitanlega B-mynda fnykur af Bullet to the Head, rétt eins og mörgum eldri myndum kappans hér á árum áður. Þeir sem sækjast eftir hasar, hamagang og þrútnum Stallone fá eitthvað fyrir hinn snúð. Í heildina séð er þetta svo sem alltílagi ræma en ef Stallone væri ekki með í fjörinu hefði myndin pottþétt aldrei ratað inn í kvikmyndahús og farið beint á DVD.

Leikstjóri: Walter Hill
Handrit: Alessandro Camon, Alexis Nolent
Leikarar: Sylvester Stallone, Sung Kang, Sarah Shahi, Jason Momoa, Christian Slater, Adewale Akinnuoye-Agbaje



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða