A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Dead Man Down | Kvikmyndavefurinn Svarthöfði

Í bíó: Dead Man Down (2013)

19. mars '13 12:04 Dead Man Down

„Dead Man Down hefði getað orðið fínasta hefndardrama, jafnvel frábær, en henni er klúðrað á síðustu metrunum með glórulausum endi. Sem er svekkjandi þar sem þessi efnilegi leikstjóri mætti gjarnan láta ljós sitt skína í Hollywood.“

Victor, hægri hönd glæpaforingja í New York, sem lendir í klemmu þegar Beatrice kúgar hann til þess að myrða fyrir sig mann sem keyrði drukkinn á hana þannig að hún situr eftir afmynduð. Þessi staða flækir stöðu Victors verulega og hann þarf að halda mörgum boltum á lofti í einu ekki síst þar sem hann er sjálfur í hefndarhug.

Leikstjóri hinnar stórgóðu Män som hatar kvinnor, eða Karlar sem hata konur, Niels Arden Oplev, leikstýrir hér sinni fyrstu kvikmynd á ensku. Kona í hefndarhug, kúgun, samsæri og blekking er meginþema Dead Man Down og minnir ögn á meistara Alfred Hitchock með dassi af Brian De Palma sem er eiginlega óhjákvæmilegt þar sem De Palma hefur löngum verið undir miklum áhrifum frá Hitchcock.

Rétt eins og í Män som hatar kvinnor eru útlit myndarinnar og stemmingin stórfín. Grámygluleg slykja er yfir öllu sem fellur vel að viðfangsefninu og þankagangi persónanna. Uppbygging myndarinnar er hæg en stigmagnast þangað til myndin hrynur eins og spilaborg á endasprettinum þegar hefndartryllirinn missir taktinn og leysist upp í snargeggjaðan skotbardaga þar sem halda mætti að búið væri að skipta Victor út fyrir John McClaine.

Oplev og Noomi Rapace sameina hér krafta sína að nýju en samstarf þeirra í Män som hatar kvinnor var einstaklega vel heppnað. Persóna Rapace sver sig í ætt við hinar fláráðu femme fatale og er helsta aðdráttarafl myndarinnar og svipar mjög til þeirra kvenpersóna sem De Palma skóp á árum áður. Colin Farrell er góður í hlutverki hefndarengilsins Victors þangað til hann umhverfist í skotglatt ofurmenni á síðustu fimmtán mínútunum eða svo. Terrance Howard leikur mafíósan sem Farrell starfar fyrir og virkar hálf bitlaus í hlutverkinu.

Dead Man Down hefði getað orðið fínasta hefndardrama, jafnvel frábær, en henni er klúðrað á síðustu metrunum með glórulausum endi. Sem er svekkjandi þar sem þessi efnilegi leikstjóri mætti gjarnan láta ljós sitt skína í Hollywood.

Leikstjóri: Niels Arden Oplev
Handrit: J.H. Wyman
Leikarar: Colin Farrell, Noomi Rapace, Terrance Howard, Dominic Cooper, Isabelle Huppert



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða