A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Double Indemnity | Kvikmyndavefurinn Svarthöfði

Úr bunkanum: Double Indemnity (1944)

22. janúar '14 11:09 Double Indemnity

„Double Indemnity er skotheld tálkonumynd sem hefur bergmálað í gegnum áratugina í seinni myndum um þetta skemmtilega efni. Samtölin eru meitluð og á milli línanna kraumar kynferðisleg spenna.“

Bandarísku rithöfundarnir Dashiell Hammett, Raymond Chandler og James M. Cain eru að öðrum ólöstuðum höfuðpáfar harðsoðnu hefðarinnar sem kennd er við film noir enda eru einhverjar endingarbestu, áhrifaríkustu og öflugustu rökkurmyndirnar byggðar á bókum þeirra.

Cain, sem þekktastur er fyrir bækur sínar The Postman Always Rings Twice, Double Indeminty og Mildred Pierce og þar af leiðandi einnig kvikmyndaútgáfur þeirra skilur sig þó frá þeim Hammett og Chandler þar sem karlpersónur hans eru af allt öðru sauðahúsi en þeir Sam Spade og Philip Marlowe sem Hammett og Chandler gerðu ódauðlega í The Maltese Falcon annars vegar og The Big Sleep, Farewell My Lovely, The Long Goodbye og svo mætti áfram telja þegar Chandler og Marlowe eru annars vegar.

Aðalkarlpersónunum í film noir má nefnilega skipta í tvo hópa, þá sem standast tálar hættulegra og kvenna og hika jafnvel ekki við að snúa við þeim baki og senda í gálgann og svo þá sem láta gredduna stjórna sér og láta hælaháar og rauðvaralitaðar háskakonur teyma sig á tittlingnum beint til helvítis og glötunnar.

Karlarnir hans Cains eru fulltrúar þessara vesælu manna sem fyrirfinnast nú sjálfsagt víðar í lífinu en hinir staðföstu naglar þeirra Hammetts og Chandlers. Ræflarnir hans Cains eru sérlega gjarnir á að láta giftar konur tæla sig til þess að stúta körlunum þeirra sem alla jafna eru nokkuð eldri en eiginkonurnar og vel efnaðir. Það er því eftir heilmiklu að slægjast fyrir þessar andhetjur sem sjá fyrir sér að með einu litlu morði öðlist þeir ást prinsessunnar, allt konungdæmið og sprellfjörugt kynlíf. Tálkvenndin ætla sér þó iðulega aðeins að nota þá í skítverkin og losa sig síðan við þá, helst í rafmagnsstólinn. Þetta er rauði þráðurinn í The Postman Always Rings Twice og Double Indemnity og tálkonusaga hefur hvorki fyrr né síðar verið sögð með öðrum eins stæl í bíó og sá fjölhæfi leikstjóri Billy Wilder gerði með þeirri síðarnefndu 1944.

Fred MacMurray leikur tryggingasalann Walter Neff sem tekur hús á Dietrichson-hjónunum til þess að fara yfir tryggingamál húsbóndans. Um leið og augu hans og Barböru Stanwyck í hlutverki frú Dietrichson mætast fara ljótar hugsanir á flug í höfði hans. Enda kannski ekki við örðu að búast þar sem Stanwyck er ómótstæðileg sem frúin fláráða. Neff kolfellur fyrir henni og fyrr en varir eru þau búin að líftryggja karlinn upp í topp og leggja drög að morði hans. Áætlun þeirra gæti svo vel gengið upp ef gamli gangsterinn Edward G. Robinson væri ekki að þvælast þarna sem Barton Keyes, yfirmaður Neffs og mikill meistari í að þefa uppi tryggingasvindl.

Double Indemnity er skotheld tálkonumynd sem hefur bergmálað í gegnum áratugina í seinni myndum um þetta skemmtilega efni. Samtölin eru meitluð og á milli línanna kraumar kynferðisleg spenna þannig að maður finnur þrá Neffs brenna á eigin skinni. Auðvitað spillir ekki fyrir að sjálfur Raymond Chandler skrifaði handritið með leikstjóranum.

Stanwyck er mögnuð í hlutverki tálkonunnar og MacMurray er litlu síðri sem viljalaust verkfæri hennar sem brunar, graður og gráðugur, að feigðarósi. Wilder var ofboðslega fjölhæfur leikstjóri, jafnvígur á spennu og grín og glens, eins og jafn ólíkar myndir og Some Like It Hot, Sunset Blvd., The Lost Weekend, Irma la Douce og One, Two, Three, svo einhverjar séu nefndar, bera glöggt vitni.

Í Double Indemnity er Wilder með góða sögu, þétt handrit, toppleikara og fléttar þessu öllu saman með tónlist og töktum í kvikmyndatöku þannig að úr verður ein eftirminnilegasta og áhrifamesta film noir-myndin sem sögur fara af. Það verður óhjákvæmilega vísað í þessa mynd með einhverju móti svo lengi sem ástæða þykir til þess að kvikmynda sögur um sjálfstæðar konur sem nota kynþokka sinn til þess að etja heimskum körlum á forað græðgi og ofbeldis.

Leikstjóri: Billy Wilder
Handrit: Billy Wilder, Raymond Chandler
Leikarar: Fred MacMurray, Barbara Stanwyck, Edward G. Robinson



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða