A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Dressed to Kill | Kvikmyndavefurinn Svarthöfði

Úr bunkanum: Dressed to Kill (1980)

30. október '13 19:30 Dressed to Kill

„Dressed to Kill er svo miklu meira en bara spennutryllir um morðingja með hárkollu og sólgleraugu.“

Sá stórkostlega mistæki en oft á tíðum bráðsnjalli leikstjóri Brian De Palma var þungt haldinn af Hitchcock-blæti á árum áður. Hann fékk hressilega útrás fyrir þetta á sínum tíma með Dressed to Kill 1980 og Body Double 1984. Í þeirri fyrrnefndu kinkar hann ákaft kolli til Psycho og í þeirri síðari leikur hann sér bráðskemmtilega að Vertigo með smá Rear Window snúningi.

En snúum okkur að Dressed to Kill og skellum okkur í blóðuga sturtu í lyftu með De Palma og co. (Hér á eftir fer samanburður á Psycho og Dressed to Kill og þar sem allt viti borið fólk á að hafa séð alla vegana Psycho er lítil samúð höfð með spoilera fælum. Reyni samt að fara varlega).

De Palma notar sömu aðferðir, til þess að blekkja áhorfandann, og Hitchcock gerði í Psycho. Fókusinn er á þunglynda MILF, Kate, sem  Angie Dickinson túlkar með bravúr. Hún verður því ígildi aðalpersónu í huga áhorfandans rétt eins og Marion í Psycho. Marion var feig vegna þess að hún stal peningum en Kate gerir sig réttdræpa samkvæmt Teboðshreyfingarstöðlum hryllingsmyndanna með því að halda fram hjá.

Marion fór svo í sturtu, eins og frægt er orðið, en Kate tekur lyftu. Búrhnífur, rakhnífur. Breytir engu.

Myndin skiptir um gír og ný kona stígur inn í banvænt sjónmál morðingjans. Lúxusmella sem Nancy Allen leikur verður nefnilega vitni að morðinu og dularfulla konan sem fremur lyftumorðið, hávaxin ljóska með dökk sólgleraugu, snýr sér að vændiskonunni. Inn í þetta blandast sálfræðingur sem Michael Caine leikur en sá hafði reynt að aðstoða döpru MILF-una í sálarkreppu hennar.

Morðinginn í myndini er kolklikkuð tranza, skyld Norman Bates en í miklu alvarlegri kynáttunarvanda. Hér takast ekki á móðir og sonur í ödipísku hugarvíli kleyfhuga, heldur karl og kona í sama huga og líkama og um leið og kona æsir karlhlutann kynferðislega hrekkur konan í varnargír með hnífinn á lofti.

Út frá búningavinklinum einum saman er Dressed to Kill auðvitað fínasta Halloween-mynd en fyrst og fremst er þetta bara bráðskemmtileg og flott hryllingsmynd. Algert gúmmilaði fyrir þá sem þekkja Psycho vel og rétt eins og sturtusenan er sú alræmdasta úr Psycho þá er lyftuatriði De Palma alveg hreint dásamlegt. Fegurðin ein.

Og Dressed to Kill býður ekki upp á jafn rúðustrikaða lausn og Psycho  gerði 1960 (endir hennar er auðvitað alveg skelfing þegar geðlæknirinn byrjar að greina aumingja Norman/mömmu). Tuttugu árum síðar er upplausnin meiri og kynuslinn hættulegri. Tranzan er frekar skrímsli en bara geðsjúkur morðingi en þetta var auðvitað löngu fyrir tíma Gay Pride og heljarstökks í réttindabaráttu samkynhneigðra og transfólks. Eiginlega er kominn tími á enn eina útgáfu af Psycho/Dressed to Kill en þangað til má vel skemmta sér yfir þessum börnum sinna tíma og velta sér upp úr þessu fram og til baka.

Dressed to Kill er svo miklu meira en bara spennutryllir um morðingja með hárkollu og sólgleraugu.

Leikstjóri: Brian De Palma
Handrit: Brian De Palma
Leikarar: Michael Caine, Angie Dickinson, Nancy Allen, Keith Gordon, Dennis Franz



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða