A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Eternal Sunshine of the Spotless Mind | Kvikmyndavefurinn Svarthöfði

DVD: Eternal Sunshine of the Spotless Mind (2004)

4. janúar '12 13:27 Eternal Sunshine of the Spotless Mind

„Hún svarar ef til vill engu en minnir á hið fornkveðna að enginn veit hvað átt hefur fyrr en misst hefur og að minningarnar eru það dýrmætasta sem við eigum þó þær geti verið sárar.“

Sambandsslit og skilnaðir geta verið farið ansi illa með fólk og það eru þá ekki síst minningarnar um þá eða þann fyrrverandi sem valda hugarangri og éta þá sem engjast í ástarsorg upp að innan.

Í Eternal Sunshine of the Spotless Mind kemst Jim Carrey að því að það er til skemmtileg og ódýr lausn á þessu hvimleiða vandamáli; maður fer bara til læknis sem hreinsar burt allar minningar um fyrrverandi kærustuna.

Aðgerðin tekur eina nótt og þegar Carrey vaknar mun hann ekki lengur sakna elskunnar sinnar, sem Kate Winslet leikur, einfaldlega vegna þess að fyrir honum hefur hún aldrei verið til.

Það borgar sig að segja sem minnst um innihald myndarinnar en atburðarásin á sér að mestu stað í huga aðalpersónunnar á meðan hún sefur og horfir á minningar sínar hverfa.

Sagan er eftir Charlie Kaufman sem átti áður að baki snilldarmyndirnar Being John Malkovich og Adaptation. Sem fyrr þvælist hann inni í kollinum á persónum sínum og það kemur vel í ljós hér að hann er orðinn býsna flinkur í þessum hugarflækjum þar sem Eternal Sunshine of the Spotless Mind er töluvert betri en fyrri myndirnar og þá er heilmikið sagt.

Sagan er í eðli sínu flókin og það hefði hæglega verið hægt að klúðra henni en framsetningin er pottþétt, áferðin smart og leikararnir svo góðir að það klikkar ekkert.

Carrey sýnir heldur betur hvað í honum býr og glansar í gegnum hlutverk sitt, Kate Winslet og Eliah Wood (ekkert hobbitalegur) eru einnig traust en senuþjófurinn er Mark Ruffalo sem tók þarna af öll tvímæli um það að hann er leikari í toppklassa.

Eternal Sunshine of the Spotless Mind vekur upp margar spurningar um ástina, hugsanir, minningar og samskipti kynjanna. Hún svarar ef til vill engu en minnir á hið fornkveðna að enginn veit hvað átt hefur fyrr en misst hefur og að minningarnar eru það dýrmætasta sem við eigum þó þær geti verið sárar.

Lækningin við ástinni og sorginni sem getur fylgt henni finnst sjálfsagt aldrei en þessi mynd getur ýft upp sár hjá áhorfendum um leið og hún veitir huggun með því að sýna svo ekki verður um villst að sársauki og söknuður er eitthvað sem er óhjákvæmilegur fylgifiskur þess að vera til.

Eternal Sunshine er hreinn gullmoli. Mynd sem gleymist seint og býður upp á endalausar vangaveltur fyrir þá sem á annað borð nenna að pæla í nokkrum sköpuðum hlut. Brilljant mynd og ekki spillir fyrir að Valdís Óskarsdóttir klippir hana og gerir hana jafnvel betri en hún hefði annars orðið.

Leikstjóri: Michel Gondry
Handrit: Charlie Kaufman
Leikarar: Jim Carrey, Kate Winslet, Mark Ruffalo



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða