A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

From Russia With Love | Kvikmyndavefurinn Svarthöfði

Úr bunkanum: From Russia With Love (1963)

26. ágúst '12 18:34 From Russia With Love

„Þrátt fyrir sjálfsöryggi Connerys gengur samt eiginlega ekkert upp hjá Bond í From Russia With Love þar sem hann lætur viljandi táldraga sig til Tyrklands þar sem hugguleg starfsstúlka í rússneska sendiráðinu notar eftirsótta dulmálsvél sem beitu fyrir Bond og leyniþjónustuna. “

Skjár einn var svo huggulegur að draga From Russia With Love úr bunkanum í síðustu viku og þótt aldur myndarinnar sé vissulega farinn að segja til sín þá stendur hún enn fyllilega fyrir sínu og er enn næst besta Bond-myndin á eftir Casino Royale sem dúndraði James Bond með látum inn í 21. öldina árið 2006.

Þegar vel er að gáð eiga From Russia With Love og Casino Royale ýmislegt sameiginlegt. Í From Russia With Love leikur Sean Connery Bond í annað skipti, er búinn að finna sig vel í hlutverkinu og leikur 007 af öryggi og þeirri hörku sem James Bond bóka Ians Fleming bjó yfir en Roger Moore glutraði niður þegar hann tók við hlutverkinu síðar. Þrátt fyrir sjálfsöryggi Connerys gengur samt eiginlega ekkert upp hjá Bond í From Russia With Love þar sem hann lætur viljandi táldraga sig til Tyrklands þar sem hugguleg starfsstúlka í rússneska sendiráðinu notar eftirsótta dulmálsvél sem beitu fyrir Bond og leyniþjónustuna.

Stúlkan, Tantania, telur sig vera að þjóna ættjörð sinni með því að leggjast með Bond en er í raun leiksoppur höfuðóvinar Bonds í Connery-myndunum, SPECTRE. Bond lætur SPECTRE spila með sig í From Russia With Love og virðist vera hálf stefnulaus og ringlaður í myndinni. Þó má vel ætla, ekki síst í ljósi öryggis Connerys, að Bond sé pollrólegur með allt sitt á hreinu og láti fara með sig sem strengjabrúðu þangað til hann getur rakið þræðina og fundið þann sem stjórnar atburðarásinni.

Tatania er sjálfsagt einhver allra þokkafyllsta Bond-stúlkan. Hjartahrein og saklaus kona í þjónustu Rússlands sem óafvitandi leyfir SPECTRE að teyma hana undir karlrembuna Bond. Daniela Bianchi, fyrrum Ungfrú Róm og keppandi í Miss World 1960, lyftir Tatönju langt yfir aðrar Bond-gellur og einhvern veginn kemst maður ekki hjá því að ímynda sér að Bond beri til hennar raunverulegar tilfinningar. Ótrúlega heillandi manneskja.

Daniel Craig er í svipaðri stöðu í Casino Royale þar sem hann leikur reynslulítinn Bond sem gerir ýmis grundvallarmistök og lætur skapið og tilfinningar trufla dómgreind sína. En með Craig kom samt ísköld harka Bonds aftur inn í myndabálkinn. Sem betur fer. Þess vegna eru Connery og Craig bestu Bondarnir og þessar títtnefndu myndir þær bestu.

From Russia With Love státar af einu allra besta slagsmála atriði myndabálksins þegar Bond og illmennið Grant takast á í járnbrautarlest. Sú magnaða fyllibytta Robert Shaw, sem síðar varð frægur fyrir að berjast við ókindina í Jaws, leikur Grant af yfirvegun og gerir hann að einum hættulegasta “henchman” sem Bond hefur komist í tæri við. Hann býr yfir öllum helstu styrkleikum Bonds en er þó ekki veikur fyrir konum og áfengi. Hann er maður sem virkilega getur haft betur en okkar maður.

Blofeld birtist einnig í fyrsta sinn í From Russia, andlitslaus að vísu, en strýkur hvíta kettinum á meðan hann planar heimsyfirráð og skelfilegan dauðdaga Bonds.  Lotte Lenya er ekki síður eftirminnilega en Shaw sem KGB-liðhlaupinn Rosa Klebb. Sú kerlingarnorn er stórkostlegur skúrkur sem stenst tímans tönn.

From Russia With Love er fyrsta myndin þar sem Desmond, heitinn, Llewelyn birtist sem græjumeistari leyniþjónustunnar Q en eftir því sem fram liðu stundir og Moore fór að fíflast með hlutverki Bonds voru það ekki síst græjurnar og og sérútbúnir bílarnir frá Q sem héldu aðdáendum Bonds við efnið.

Þá má ekki gleyma helstu hjálparhellu Bonds í From Russia With Love, umboðsmanni leyniþjónustunnar í Tyrklandi, Kerim Bey, sem mexíkóski leikarinn Pedro Armendariz gerir dásamleg skil. Með Kerim og Bond tekst vinátta og þegar Grant er búinn að drepa Kerim sýnir Bond sjaldséðar tilfinningar og reiðin brennur í augum Connerys. Rene Mathis, sem Giancarlo Giannini leikur í Casino Royale og Quantum of Solace, er bergmál af Kerim Bey. Hann er Bond innan handar í tveimur verkefnum og þegar Bond finnur hann dauðann í Quantum of Solace kraumar reiðin í Craig sem kastar svo líki vinar síns í næsta ruslagám. Ekta Bond.

Leikstjórinn Terence Young leikstýrði einnig fyrstu Bond-myndinni Dr. No og hafði síðan aftur taumhald á Connery í Thunderball. Í From Russia With Love er Young með allt á tæru og fyrrnefnd slagsmál í lestinni, hraðbátaeltingarleikurinn í lokin og lokatilraun Klebb til að kála Bond eru atriði sem flokkast með þeim eftirminnilegustu í kvikmyndasögu Bonds. Að ógleymdri senunni þar sem Young kinkar kolli til Hitchcocks og North By Northwest þegar Bond á fótum fjör að launa hundeltur af tvíþekju í miðri auðn.

Ástæðurnar fyrir því að From Russia With Love er klassík eru einfaldlega bara of margar.

Leikstjóri: Terence Young
Handrit: Richard Maibaum, Johanna Harwood
Leikarar: Sean Connery, Robert Shaw, Lotte Lenya



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða