A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Gangster Squad | Kvikmyndavefurinn Svarthöfði

Í bíó: Gangster Squad (2013)

25. janúar '13 12:53 Gangster Squad

„Gangster Squad hefði getað verið töluvert betri í höndunum á reyndari leikstjóra sem er ekki með allt á yfirsnúning. Þótt sagan risti ekki djúpt þá sleppur myndin þó fyrir horn sem fín skemmtun.“

Árið er 1949 í Los Angeles. Glæpamaðurinn Mickey Cohen hefur sölsað borgina undir sig og stjórnar henni með harðri hendi. Hann hefur alla pólitíkusa og lögreglumenn í vasanum. Hópur lögreglumanna ætlar þó ekki að sitja aðgerðarlaus og ákveða að leggja skjöldinn upp á hilluna og snúa bökum saman í þeim tilgangi að koma Cohen og samtökum hans fyrir kattarnef.

Gangster-myndir voru á þriðja áratugnum framleiddar á færiböndum og frægðarsólir James Cagney og Edwards G. Robinson stóðu sem hæst. Glæpamenn lifðu ameríska draumnum, stóðu upp í hárinu á yfirvaldinu og tóku það sem þeir vildu þegar þeir vildu. Mickey Cohen kemur seint til leiks eða þegar þetta tímabil hefur runnið sitt skeið. Seinni heimstyrjöldinni er lokið, glæpamenn eru hættir að vekja aðdáun almennings og hrottaskapurinn ræður ríkjum í borg englanna.

Ruben Fleischer fylgir eftir hinni stórfínu Zombieland með Gangster Squad og fer frá því að berja uppvakninga sundur og saman yfir í gallharða glæpona sem salla niður saklausa borgara. Í Zombieland beitti Fleischer ferskum stíl sem fór þeirri mynd einkum vel. Hann reynir að yfirfæra þennan stíl yfir á Gangster Squad og virkar útkoman þvinguð; eins og hann sé að reyna of mikið að vera töff. Hægfara skotbardagar og yfirkeyrður bílahasar á ekki heima í gangster-mynd, eða allavega ekki í hans höndum, og verður fyrir vikið þessi tiltekni stíll að stílbroti sem þvælist fyrir atburðarásinni.

Tímabilið og viðfangsefnið býður uppá endalausta möguleika en Fleischer og handritshöfundinum gengur brösulega að koma sér af stað. Efniviðurinn er til staðar en pappírsþunnar persónur og ástæðurnar fyrir gerðum þeirra og ákvörðunum ganga þvert á ýmis atriði sem koma fram fyrr í myndinni.

Það vantar ekki stjörnurnar í Gangster Squad með Sean Penn, Josh Brolin, Emmu Stone og Ryan Gosling í fremstu víglínu. Penn fer vel með bitastæðasta hlutverk myndarinnar og er í þungavigt samanborið við Brolin og Gosling sem fara áreynslulaust með hlutverk forsprakka lögguhópsins. Robert Patrick virðist hafa villst á þessari og The Expendables sem kúrekinn í hópnum og Nick Nolte rausar út í eitt.

Gangster Squad hefði getað verið töluvert betri í höndunum á reyndari leikstjóra sem er ekki með allt á yfirsnúning. Þótt sagan risti ekki djúpt þá sleppur myndin þó fyrir horn sem fín skemmtun.

Leikstjóri: Ruben Fleischer
Handrit: Will Beall, Paul Lieberman
Leikarar: Josh Brolin, Sean Penn, Ryan Gosling, Emma Stone, Nick Nolte, Anthony Mackie, Robert Patrick, Michael Peña, Giovanni Ribisi



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða