A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Hummingbird | Kvikmyndavefurinn Svarthöfði

Í bíó: Hummingbird (2013)

12. ágúst '13 10:46 Hummingbird

„Hummingbird hefur ýmislegt til að bera, lofar nokkuð góðu framan af en nær aldrei almennilegu flugi og klisjuhjakkið hérna er bara aðeins of mikið af því góða. “

Jason Statham stimplaði sig inn í harðjaxladeildina með eftirminnilegum stæl Lock, Stock and Two Smoking Barrels fyrir fimmtán árum og fautaðist hratt og örugglega á toppinn þar með myndum eins og Snatch., The Transporter, The Italian Job, Crank, framhaldsmyndum af Crank og The Transporter og svo auðvitað The Expendables þar sem hann er í fylkingarbrjósti ásamt Sylvester Stallone. Verðugur fulltrúi nýrrar kynslóðar harðhausa enda kominn á þann stað sem Stallone, Schwarzenegger og Bruce Willis voru forðum.

Statham, eða The Stath, er alvöru töffari, fyrrverandi landsliðsmaður Bretlands í dýfingum og hvað eina. Hann er svo svalur að yfirleitt tekst honum að lyfta öllum sínum myndum upp fyrir meðallag, alveg sama hversu mikil steypa þær eru. The Stath þarf bara að mæta og málið er dautt. Og allir vondu kallarnir líka.

Þótt Stath-inn sé búinn að hasla sér völl í Hollywood finnst honum enn voða gaman og notalegt að gera myndir heima á Englandi. Eitthvað sem hann ætti ef til vill að fara að endurskoða þar sem undanfarið hafa Bretlandsmyndirnar hans verið slöppustu myndirnar hans.  Blitz, Killer Elite og nú, því miður, Hummingbird.

Hummingbird hefur ýmislegt til að bera, lofar nokkuð góðu framan af en nær aldrei almennilegu flugi og klisjuhjakkið hérna er bara aðeins of mikið af því góða. Ekki er þó við Stath-inn að sakast enda reiknum við með og ætlumst til að fá klisjurnar okkar í myndum af því tagi sem hann hefur sérhæft sig í.

The Stath sýnir meira að segja í Hummingbird að hann gæti vel ráðið við dýpri og dramatískari rullur en snoðhaussins sem lemur alla í klessu án þess að blása úr nös. Leikstjórinn og handritshöfundurinn,S teven Knight, sem er þekktari fyrir handritaskrif en leikstjórn (Eastern Promises) nær bara ekki nógu góðum tökum á eigin efni og yfirspilar sig í öllum helstu standördunum.

The Stath er að þessu sinni sérsveitarmaður í hernum sem fær upp í kok af viðbjóðnum sem hann upplifir og tekur þátt í. Hann lætur sig því bara hverfa og er eftirlýstur sem liðhlaupi og á yfir höfði sér dóm fyrir herdómstóli. Tættur á sál og líkama eigrar hann heimilislaus um London, orðinn alger róni sem notar brennivín og hvaða efni önnur sem hann kemst yfir til þess að halda minningum um ógeðið niðri. Á götunni kynnist hann Dawn, ungri konu sem er ekki síður í vondum málum, en þau styðja hvort annað í hrakningunum og fíkninni.

Það er ekki sjón að sjá okkar mann. Síðhærður, klepraður og skítugur í ekta rónagalla þegar hann er kynntur til leiks. Þá ráðast ofbeldisfautar og skítakrimmar á hóp útigangsmanna og berja Stath-inn í kássu. Hann kemst undan á flótta og rambar á mannlausa íbúð og fær þar athvarf og tækifæri til þess að yfirtaka líf eigandans. Hann byrjar á því að raka sig, þvo sér og stela jakkafötum og það er eins og við manninn mælt. Subbulegur róni breytist í The Stath og þá mega nú fúlmenninn fara að vara sig.

Hann ákveður að taka sig taki og gerist öflugur handrukkari fyrir kínveska mafíósa. Í militíðinni hverfur Dawn af götunni, manseld í vændi og Stath-inn vekur upp kynferðislegar langanir og heitar tilfinningar hjá nunnu sem sinnir útigangsfólki. Það er í því í mörgu að snúast og ýmiss að hefna hjá okkar manni sem verður hálfgerður verndarengill þeirra sem minna mega sín á götunni samhliða því sem hann vinnur skítverk fyrir glæpagengi.

Knight virðist því hafa lagt upp með að segja dramatíska sögu um iðrun og endurlausn með mannlegum kjarna en því miður dugir honum ekki góður vilji og sagan rennur út í marglaga klisjubúðing og hefðbundinn Stath-ara. Sem er svo sem allt í lagi og Statham gerir það sem hann gerir best með sama sóma og stæl og venjulega.

Hann er svo svalur og harður að hann getur hótað vopnuðum manni með teskeið og hvorki skítalabbinn né áhorfendur efast eitt augnablik um að þessi maður er bannvænn, jafnvel með teskeið eina að vopni. Þessi áhrifamáttur hans dugir þó því miður ekki til þess að draga Hummingbird upp úr miðjumoðinu þótt við, sem fílum, The Stath fáum svosem það sem við viljum.

Leikstjóri: Steven Knight
Handrit: Steven Knight
Leikarar: Jason Statham, Agata Buzek, Vicky McClure



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða