A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Kick-Ass | Kvikmyndavefurinn Svarthöfði

Úr bunkanum: Kick-Ass (2010)

26. júní '12 21:47 Kick-Ass

„Þessi mynd er í einu orði sagt frábær. Hún sprettur beint upp úr sprellfjörugri deiglu þar sem myndasaga og kvikmynd bráðna saman með sérdeilis prýðilegum árangri.“

Lúðinn Dave er ósköp venjulegur myndasögunörd. Í klassískri tilvistarkreppu fórnarlambsins veltir hann þeirri sjálfsögðu heimspekilegu spurningu fyrir sér hvers vegna í ósköpunum enginn sé löngu búinn að fara að fordæmi ofurhetja myndasögublaðanna, skella sér í grímubúning og hjálpa lítilmagnanum í baráttunni við skúrka og skítmenni.

Hann ákveður að sitja ekki við orðin tóm, pantar sér búning og ræðst gegn glæpaskrílnum í hverfinu í gervi hetjunnar Kick-Ass. Þessi renglulegi unglingur á að vísu ekki mikið í skúrkana en lætur samt ekki deigan síga.

Á sama tíma gera grímuklæddu feðginin Hit-Girl og Big Daddy umfangsmiklum fíkniefnasala í New York skráveifur og ljóst að þau eru í ofurhetjubransanum af fullri alvöru. Hit-Girl er ellefu ára en lætur sig ekki muna um að saxa glæpalýðinn í spað með hnífum, spjótum og sveðjum og er ekki síður skæð með skotvopn í höndum.

Feðginin vinna sín verk í kyrrþey þannig að Kick-Ass, sem er orðinn heimsfrægur á Youtube, er eignaður heiðurinn af blóðugum fíkniefnaforvörnum Hit-Girl og Big Daddy. Mafían fær því vitaskuld mikinn áhuga á að hafa hendur í hári Kick-Ass og ýmsum brögðum er beitt til þess að bregða fæti fyrir grímulúðann sem á sér varla viðreisnar von án Hit-Girl og Big Daddy.

Þessi mynd er í einu orði sagt frábær. Hún sprettur beint upp úr sprellfjörugri deiglu þar sem myndasaga og kvikmynd bráðna saman með sérdeilis prýðilegum árangri. Hér er í raun gert góðlátlegt grín að ofurhetjum en samt með fullri virðingu auk þess sem Kick-Ass er um leið fyrirtaks ofurhetjumynd þótt kempurnar búi ekki yfir neinum yfirnáttúrulegum eiginleikum. Þrátt fyrir gáskafullt yfirbragðið er ekkert gefið eftir í ofbeldinu sem er alveg hreint unun á að horfa þegar hasarinn byrjar fyrir alvöru.

Kvikmyndataka, klippingar og tónlistarval eru til stakrar fyrirmyndar og lyfta bardagaatriðum myndarinnar í hæstu hæðir. Þetta er allt svo yfirgengilega töff að um mann fer gæsahúð þegar litla elllefu ára stelpuskottið með bleiku hárkolluna brytjar niður heilu herskarana af mafíósum.

Nicolas Cage er upp á sitt allra besta í hlutverki Big Dady, sem á óuppgerðar sakir við mafíósa sem hinn magnaði senuþjófur Mark Strong (Sherlock Holmes, Body of Lies, RocknRolla) leikur. Aaron Johnson er eðalnörd og maður getur ekki komist hjá því að míga á sig af hrifningu yfir Chloe Moretz í hlutverki Hit-Girl sem er aðaldrápsmaskínan í þessari æðisgengnu mynd.

 

Leikstjóri: Matthew Vaughn
Handrit: Jane Goldman, Matthew Vaughn eftir myndasögu Mark Millar og John Romita Jr.
Leikarar: Aaron Johnson, Chloë Moretz, Nicolas Cage



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða