A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Love Actually | Kvikmyndavefurinn Svarthöfði

Úr bunkanum: Love Actually (2003)

19. desember '12 00:00 Love Actually

„Myndin sker sig þó úr að því leyti að hér segir Curtis ástarsögur óvenju margra einstaklinga og fléttar þær saman í eina alls herjar feelgood mynd sem ætti að koma öllum í jólaskap...“

Leikstjórinn og handritshöfundurinn Richard Curtis veit hvað hann syngur þegar hann er á rómantísku nótunum. Love Actually er fyrsta leikstjórnarverkefni hans og hún sver sig í ætt við þær rómantísku gamanmyndir sem hann hafði skrifað áður. Efnistökin eru áþekk og rétt eins og í Four Weddings and a Funeral, Notting Hill og Bridget Jones fer sjarmatröllið Hugh Grant með mikilvægt hlutverk í Love Actually.

Myndin sker sig þó úr að því leyti að hér segir Curtis ástarsögur óvenju margra einstaklinga og fléttar þær saman í eina alls herjar feelgood mynd sem ætti að koma öllum í jólaskap en myndin hefst einmitt fimm vikum fyrir jól og eins og náttúrulögmálin gera ráð fyrir eykst ástinni ásmeginn eftir því sem jólin þokast nær.

Það má helst finna að lengd myndarinnar en mikill fjöldi aðalpersóna teygir óhjákvæmilega svolítið á lopanum. Þetta er þó algert aukaatriði þar sem Curtis teflir fram ótrúlega glæsilegum leikarahópi sem fer létt með að heilla áhorfendur. Það mæðir mikið á þungaviktarfólkinu Grant, Colin Firth, Liam Neeson, Emmu Thompson og Alan Rickman en aðrir leikarar gefa þeim ekkert eftir og þannig stelur Bill Nighy hverri senunni á fætur annarri þegar hann nánast endurtekur hlutverk sitt úr Still Crazy. Alveg óborganlegur gaur.

Rowan Atkinson er hins vegar ofaukið en Curtis reynir jafnan að trana þessum gamla félaga sínum fram. Hann var stílbrot á Four Weddings og hér er hann alveg út úr kú.

Annars er ekki hægt að segja annað en að Love Actually sé frábær skemmtun og þörf áminning um að það er fyrst og fremst ástin og náungakærleikurinn sem eru haldreipi okkar í sturluðum heimi kreppu og stríðsátaka. Þannig að það er um að gera að vekja ástina og hlýjuna í garð náungans með því að horfa á Love Actually og minnast um leið boðskapar frelsarans sem var í jötu borinn á jólunum í eldgamla daga. Elskum og fyrirgefum!

Leikstjóri: Richard Curtis
Handrit: Richard Curtis
Leikarar: Hugh Grant, Colin Firth, Liam Neeson, Emmu Thompson, Alan Rickman og Bill Nighy



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða