A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Man of Steel | Kvikmyndavefurinn Svarthöfði

Í bíó: Man of Steel (2013)

26. júní '13 12:09 Man of Steel

„Man of Steel er glæsileg tæknibrelluveisla en það er svo miklu meira spunið í persónuna og gildi hennar en þetta. Allur boðskapur virðist hafa fallið utanborðs og í staðinn eru fjöldaframleidd bardagaatriði sem skortir allan frumleika.“

Superman flýgur aftur inn í kvikmyndahús í Man of Steel eftir níu ára fjarveru. Þessi þekkta ofurhetja hefur átt erfitt uppdráttar í kvikmyndum og aðdáendum hefur þótt lítið til þeirra mynda koma sem hafa verið gerðar síðustu áratugi. Aðdáendur og fjöldi áhugamanna tóku þeim fréttum fagnandi þegar tilkynnt var að Christopher Nolan myndi taka ofurmennið undir sinn verndarvæng og framleiða mynd sem væri hetjunni verðug.

Í Man of Steel er Superman-bálkurinn endurræstur og fær nýtt upphaf. Zack Snyder, sem áður gerði Watchmen og 300, leikstýrir myndinni eftir handriti Davids S. Goyer og Nolans. Leikstjórastíll Snyders einkennist af mikilli glysgirni og oftar en ekki leggur hann meiri áherslu á útlit en innihald og sú er raunin í þessu tilfelli.

Hér er enn ein upprunasagan (e. origin) tekin fyrir og er sagt frá hvernig Kal-El/Superman/Clark Kent endaði á jörðinni. Íburðarmikil sagan í byrjun myndarinnar snýst um Krypton, heimaplánetu ofurmennisins, þar sem Russell Crowe fer vel með hlutverk föður Supermans. Í kjölfarið taka fósturforeldrar hans við keflinu og ala hann upp í jafningjaumhverfi þar sem hann fer leynt með hæfileika sína.

Fyrri hluti myndarinnar virkar vel þrátt fyrir brösulega byrjun á Krypton en seinni hlutinn fer algjörlega í hundana með fáránlegri framvindu og illa skrifuðum samtölum. Það er eins og aðstandendur hafi ekki vitað hvernig ætti að tækla nýstárlegra ofurmenni og er furðulegur pól í hæðina með áherslu á að Superman sé geimvera. Ekki skánar það í lokaatriði myndarinnar þegar Superman framkvæmir verknað sem hæfir persónunni ekki og brýtur á bága við siðgæði hennar.

Bretinn Henry Cavill ber skikkjuna vel í hlutverki ofurmennisins og hann fær vonandi að klæðast henni í næstu mynd. Amy Adams og persóna hennar, Lois Lane, eru hins vegar úti á þekju og virðast hvergi passa inn og kemur við sögu í tilviljanakenndum atriðum sem er oftar en ekki ofaukið. Michael Shannon leikur hershöfðingjann Zod og gerir lítið annað en öskra og látast vera pirraður. Terence Stamp gerði þetta töluvert betur hér árum áður í Superman II en Shannon leikur hlutverkið á sama máta og fjölmörg önnur sem hann tæklað á síðastliðnum árum. Fjöldi leikara á góða innkomu, til dæmis Crowe sem Jor-El og Kevin Costner og Diane Lane sem fósturforeldar Clarks.

Man of Steel er glæsileg tæknibrelluveisla en það er svo miklu meira spunið í persónuna og gildi hennar en þetta. Allur boðskapur virðist hafa fallið utanborðs og í staðinn eru fjöldaframleidd bardagaatriði sem skortir allan frumleika. Vissulega er gaman að fylgjast með þeim svona til þess að byrja með en áður en langt um líður missa þau slagkraftinn. Hið sama má segja um myndina.

Leikstjóri: Zack Snyder
Handrit: David S. Goyer, Christoper Nolan
Leikarar: Henry Cavill, Amy Adams, Michael Shannon, Russell Crowe, Diane Lane, Kevin Costner, Laurence Fishburne



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða