A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Mesrine: Killer Instinct | Kvikmyndavefurinn Svarthöfði

Blu-ray: Mesrine: Killer Instinct (2008)

6. desember '11 15:59 Mesrine: Killer Instinct

„Sannkallað meistarastykki sem nartar í hælana á bestu gangster-myndum meistara Martins Scorsese.“

Jacques Mesrine er almennt talinn einn þekktasti afbrotamaður Frakka. Umsvif hans voru allt frá bankaránum og fjárkúgun til morða á lögreglumönnum og öðrum sem voru svo óheppnir að standa í vegi hans. Hér í fyrri hluta sögunnar, Mesrine: Killer Instinct, er stiklað á stóru á upphafsárum hans og einna helst fjallað um þá atburði sem urðu til þess að hann fékk viðurnefnið „Óvinur númer eitt" í Frakklandi.

Uppbygging myndarinnar er í raun ekkert frábrugðin öðrum gangster-myndum enda er hér um sígilda frásagnaraðferð að ræða; Mesrine er sýndur í faðmi fjölskyldunnar áður en hann fær smjörþefinn af hinu spennandi lífi glæpamannsins. Áhorfendur fá góða hugmynd um úr hverju Mesrine er gerður og hvað það er við líf afbrotamannsins sem heillar hann. Samtölin eru í takt við persónurnar og atburðarásin spennandi.

Leikstjórinn, Jean-François Richet, hefur góð tök á sögunni og þá sérstaklega leikurunum. Vincent Cassell hefur firnasterk tök á hlutverki sínu sem Mesrine og er magnað að sjá hann þróast frá því að hafa komist á bragðið með drápi í Alsír yfir í að stráfella menn hægri vinstri. Frakkinn góðkunnugi Gérard Depardieu leikur höfuðpaur sem kemur Mesrine á lagið og glæðir hann söguna með vissum raunveruleikablæ með návist sinni. 

Þessi fyrri hluti sögu Mesrine skilur við áhorfandann skömmu eftir skotbardaga milli „hetjunnar" okkar og eftirlitsmanna skógarsvæðis. Það er á hreinu að þessi saga er vart hálfnuð og ef marka má fyrri hlutann þá eiga áhorfendur von á góðu. Allavega hefur undiritaður sjaldan verið skilinn eftir jafn sólginn í framhald eins og hér. Mesrine er langt frá því að verða búinn að svala blóðþorsta sínum og áhorfenda sinna. Sannkallað meistarastykki sem nartar í hælana á bestu gangster-myndum meistara Martins Scorsese.

Leikstjóri: Jean-François Richet
Handrit: Jacques Mesrine, Abdel Raouf Dafri, Jean-François Richet
Leikarar: Vincent Cassel, Gérard Depardieu, Cécile De France, Roy Dupuis



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða