A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Mud | Kvikmyndavefurinn Svarthöfði

Í bíó: Mud (2012)

23. september '13 14:42 Mud

„Mud er vönduð og góð þroskasaga ungs pilts sem stendur á krossgötum í lífinu og myndin minnir áhorfendur á að það er hægt að elska á fleiri en einn veg. Og að hver ákvörðun sem tekin er hefur afleiðingar.“

Tveir ungir piltar finna felustað dularfulls manns á hólmi einum í víðáttumikilli náttúru Arkansas. Maðurinn er á flótta undan laganna vörðum og bíður eftir rétta tækifærinu til þess að flýja með sinni heittelskuðu. Piltarnir samþykkja að aðstoða manninn gegn því að þeir fái að taka við felustað hans.

Þegar horft er á Mud verður varla hjá því komist að leiða hugann að hinni sígildu Stand by Me þar sem hópur stráka lagði upp í ævintýraleiðangur sem átti eftir að móta þá til frambúðar. Í báðum þessum myndum eru piltarnir í leit að lausnum á vandræðum sínum og svörum við spurningum sem brenna á þeim.

Jeff Nichols leikstýrir þessari frábæru mynd sem er í raun þroskasaga ungs pilts sem axlar ábyrgð á því að bjarga sambandi tveggja einstaklinga á sama tíma og foreldar hans eru að skilja. Tye Sheridan leikur hinn fjórtán ára gamla Ellis sem kemst að raun um að ástin getur verið sársaukafull og erfið þótt hún sé gagnkvæm og innileg.

Sheridan er óumdeild stjarna myndarinnar og sýnir magnaðan leik í veigamiklu og erfiðu hlutverki þessa unga pilts sem stendur frammi fyrir þungum ákvörðunum. Og spurningarnar sem brenna á vörum hans eru spurningar sem margir hafa þurft að spyrja sig að eða vinna úr án þess að eiga við þeim svör. Þá er Jacob Lofland einnig góður í hlutverki hins piltsins í tvíeykinu.

Matthew McConaughey er frábær í hlutverki flóttamannsins en á síðustu tveimur árum hefur hann heldur betur sýnt hvers megnugur hann er sem leikari. Með vali á áhugaverðum og krefjandi hlutverkum hefur hann snúið á þá sem hafa viljað draga hann í ákveðna dilka og stimplað sig inn sem framúrskarandi leikari. Í öðrum hlutverkum eru Reese Witherspoon, Jacob Lofland, Michael Shannon og gamla brýnið Sam Shepard.

Mud er vönduð og góð þroskasaga ungs pilts sem stendur á krossgötum í lífinu og myndin minnir áhorfendur á að það er hægt að elska á fleiri en einn veg. Og að hver ákvörðun sem tekin er hefur afleiðingar.

Leikstjóri: Jeff Nichols
Handrit: Jeff Nichols
Leikarar: Matthew McConaughey, Tye Sheridan, Jacob Lofland, Sam Shepherd, Reese Witherspoon, Michael Shannon



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða