A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Now You See Me | Kvikmyndavefurinn Svarthöfði

Í bíó: Now You See Me (2013)

13. júní '13 20:14 Now You See Me

„Töfrabrögðin í Now You See Me eru töff og skemmtilega útfærð en grundvöllurinn sem myndin byggist á gengur einfaldlega ekki upp.“

Fjórmenningar sameina krafta sína og setja á svið ótrúlegustu töfrabrögð sem sögur fara af. Hópurinn, sem kallar sig Hestamennina fjóra, er í rannsókn hjá Alríkslögreglunni og Interpol eftir að þau ræna milljörðum úr banka á ótrúlegan máta, fyrir augum áhorfenda.

Töfrabrögð hafa ekki oft orðið fyrir valinu sem efniviður kvikmynda. Á síðustu árum hafa tvær slíkar staðið upp úr, The Illusionist og The Prestige sem Christopher Nolan leikstýrði. Í báðum myndunum var leikið með þá hugmynd að töfrar væru mögulega raunverulegir og það sama er gert í Now You See Me sem Louis Leterrier leikstýrir. Galdrar og töfrar eru ansi lúmskir í kvikmyndum og oftar eru myndirnar byggðar þannig upp að í lokin á sér stað viss „afhjúpun“ en oftar en ekki reynist erfitt að láta hlutina ganga upp. Og sú er raunin í Now You See Me þar sem myndin hrynur eins og spilaborg á síðustu metrunum.

Áhorfendum eru kynntar persónur og aðstæður, sem leggur grundvöllinn að skilning þeirra á myndinni. Á lokasprettinum reyndist sá skilningur vera rangur, eða öllu heldur plat. Þetta er eins og að sjá töframann draga kanínu upp úr hatti, og svo kemur í ljós að töframaðurinn er að draga sjálfan sig í gegnum hattinn. Þetta er frekar fátækleg samlíking en rétt eins og þetta töfrabragð þá gengur myndin einfaldlega ekki upp. Fyrir vikið er verið að draga áhorfendur á asnaeyrunum með blekkingum.

Í upphafi myndarinnar eru áhorfendur kynntir fyrir fjórum hæfileikaríkum einstaklingum sem hafa hver og einn sérhæft sig á ákveðnu sviði. Saman mynda þau ofurteymi líkt og Oceans-gengið í Ocean's Eleven. Hópurinn er skipaður Jesse Eisenberg, Islu Fisher, Dave Franco og hinum hressa Woody Harrelson. Persónur Francos og Harrelsons eru áhugaverðar og hefði verið gaman að skyggnast bakvið tjöldin og kynnast þeim almennilega. Mark Ruffalo leikur lögreglumanninn sem reynir að hafa hendur í hári töframannanna og Morgan Freeman leikur hálfgerðan töfrabana sem ætlar klekkja á töframönnunum. Gamla brýnið Michael Caine er illa nýttur sem bakhjarl fjórmenninganna og hefði verið gaman að sjá hann leika stærra hlutverk.

Töfrabrögðin í Now You See Me eru töff og skemmtilega útfærð en grundvöllurinn sem myndin byggist á gengur einfaldlega ekki upp. Auðvitað er þetta allt skemmtun, gott og blessað, en hún þarf að ganga upp. Framvinda myndarinnar er á köflum fjörug og forvitnileg en myndin fellur flöt á lokasprettinum og fannst undirrituðum hann vera svikinn.

Leikstjóri: Louis Leterrier
Handrit: Ed Solomon, Boaz Yakin, Edward Ricourt
Leikarar: Jesse Eisenberg, Mark Ruffalo, Woody Harrelson, Isla Fisher, Dave Franco, Morgan Freeman, Common, Michael Caine



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða