A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Oldboy | Kvikmyndavefurinn Svarthöfði

Í bíó: Oldboy (2013)

11. maí '14 13:09 Oldboy

„Breytingar Lees bæta nákvæmlega engu við Oldboy anno 2003 þótt myndin sé í sjálfu sér áferðarflott og vel frambærileg spennumynd.“

Kóreanska ofbeldisveislan Oldboy frá 2003 er einhver allra besta hefndarmynd sem sögur fara af. Firnasterk, áhrifamikil, ógleymanleg og ruddalega vel stílfærð. Chan-wook Park leikstýrði þessari sögu hins lánlausa Oh Dae-Su sem vaknaði eftir fyllerí í ókunnugu herbergi þar sem honum er síðan haldið föngnum í fimmtán ár. Þegar honum er sleppt lausum hefur hann leit að ósýnilegum kvalara sínum, í trylltum hefndarhug. Blóðugur hefndarleiðangurinn á síðan eftir að hafa dramatískar afleiðingar fyrir hann og aðra og það sem hann finnur við leiðarlok, eftir að hafa meðal annars rústað heilu krimmagengi með klaufhamri, er hryllilegra en hann hefði getað órað fyrir.

Þegar það spurðist út fyrir fáum misserum að sá heillum horfni leikstjóri Spike Lee, sem hefur ekki gert margar boðlegar kvikmyndir í seinni tíð, hyggðist endurgera Oldboy ærðust aðdáendur frummyndarinnar víða um lönd þar sem þeim þótti Lee ætla sér að ryðjast freklega inn í helg vé. Þess vegna er líklega rétt að byrja á að halda því til haga að auðvitað má alveg endurgera hvað sem er, þótt oft reynist slíkt brölt vera með öllu tilgangslaust. Þetta skaðar frummyndirnar þó ekki neitt. Psycho Hitchcocks er enn sama snilldin þótt Gus Van Sant hafi litljósritað hana 1998.

Josh Brolin leikur hér auglýsingamanninn, drulluhalann og drykkjusjúklinginn Joe Doucett. Á afmælisdegi ungrar dóttur sinnar kýs hann að hrynja í það frekar en að heilsa upp á barnið og fyrrerandi eiginkonuna. Fjarvera hans frá dótturinni verður síðan miklum mun lengri en hann ætlaði. Hann er numinn á brott í blakkátinu og rankar við sér innilokaður í einhvers konar hótelherbergi og þar fær hann að dúsa næstu 20 árin, fóðraður á núðlum og vodka í gegnum hundalúgu. Eina tenging hans við umheiminn er sjónvarpið og þar kemst hann að því að fyrrverandi kona hans hafi verið myrt, hann sé eftirlýstur grunaður um glæpinn og dóttirin komin í fóstur.

Joe er svo loks sleppt lausum, með farsíma og fullt af peningum og hefst þá leitin að þeim sem rændi hann tuttugu árum. Lee fylgir kóreönsku myndinni nokkuð nákvæmlega eftir, gerir smávægilegar breytingar hér og þar (smáforritið Shazam kemur til dæmis við sögu sem eðli málsins samkvæmt gat ekki gerst 2003) og segja má að hann straumlínulagi frásögnina aðeins.

Sá frábæri og alltof sjaldséði leikari Michael Imperioli (Christopher úr The Sopranos) setur skemmtilegan svip á myndina og ber höfuð og herðar yfir aðra leikara í hluterki félaga Joes sem reynir að hjálpa honum eftir fremsta megni. Elizabeth Olsen nær líka tökum á manni sem ung kona sem verður á vegi Joes og á eftir að hafa mikil áhrif á framvinduna. Samuel L. Jackson ofleikur yfir sig sem fangavörður Joes, með fíflalegustu hárgreiðslu sem hann hefur skartað hingað til, og Sharlto Copley rambar einhvers staðar á milli þess að vera fáránlegur og frábær í túlkun sinni á erkióvini Joes.

Breytingar Lees bæta nákvæmlega engu við Oldboy anno 2003 þótt myndin sé í sjálfu sér áferðarflott og vel frambærileg spennumynd. Einhverjir gagnrýnendur í útlandinu hafa gripið til þeirrar líkingar að þessi mynd sé eins og ábreiða þokkalegrar hljómsveitar af frábærum og sígildum slagara. Alls ekki vitlaust og í raun kjarni málsins.

Josh Brolin er góður leikari og hann gerir Joe fín skil. Persónan þróast á sannfærandi hátt í meðförum hans, frá glataðri fyllibyttu í hefndaróðan brjálæðing sem getur gert ómælt tjón með einum hamri. Munurinn á þessum tveimur myndum kristallast einmitt í margrómuðu hamarsatriðinu, sem Lee hefði mögulega átt að sleppa þar sem hann stenst Chan-wook Park ekki snúning þegar sá djöfulgangur byrjar. Barsmíðarnar í frummyndinni voru einhvern veginn eins og útpælt nútímadansverk, seiðandi og heillandi í öllu sínu suddalega ofbeldi. Lee reynir að kópera þetta en vantar neistann. Og þarna skilur myndirnar að. Sprengikrafturinn, hin ofboðslega þrúgandi mannlega þáning og hryllingur sem gerðu Oldboy 2003 ógleymanlega eru ekki til staðar hér.


Hvað skal segja? Nýja myndin er soldið ameríkaniseruð og fáir kunna þá kúnst að ræna hluti sálinni og fletja þá út betur en Bandaríkjamenn. Þessi endurgerð er þó sem betur fer alls engin móðgun við Oldboy og er alveg álitleg, en með öllu óþörf.
 

Lesa gagnrýni Svarthöfða um Oldboy 2003

Leikstjóri: Spike Lee
Handrit: Mark Protosevich, (Garon Tsuchiya, Nobuaki Minegishi)
Leikarar: Josh Brolin, Elizabeth Olsen, Sharlto Copley, Samuel L. Jackson, Michael Imperioli



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða