A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Out of the Furnace | Kvikmyndavefurinn Svarthöfði

Í bíó: Out of the Furnace (2013)

17. febrúar '14 14:48 Out of the Furnace

„Með þennan mannskap og ágætis grunn að sögu hefði Out of the Furnace orðið að einhverju en Cooper missir tökin á þessu öllu og myndin fjarar út í eymdarlegt volæði...“

Leikstjórinn og handritshöfundurinn Scott Cooper vakti nokkra athygli með mynd sinni Crazy Heart árið 2009. Myndin var að vísu ekkert sérstaklega skemmtileg en fór langt á frábærum leik Jeff Bridges sem landaði Óskarnum fyrir leik sinn í henni. Cooper hikar ekkert við að setja markið hátt og ekki skortir hann metnaðinn en Out of the Furnace, sem kemur í kjölfar Crazy Heart, bendir til þess að leikstjórinn eigi enn ýmislegt ólært.

Hér hefur Copper yfir feikilega öflugum mannskap að ráða en ætlar sér að segja of mikla sögu og missir myndina út í hægfara og langdregna loðmullu sem hann reynir að blása lífi í með ruddalegum slagsmálaatriðum og ofbeldisfullu endatafli. Sá mikli mannlegi harmleikur um skyldur, ættrækni og hörmungarnar sem geta fylgt þeim sem dæmir sig sjálfur til að gæta bróður síns rennur út í ósköp staðlaða töffaramynd um vonda og góða gæja sem eru miklir karlar í krapinu.

Christian Bale og Casey Affleck leika bræðurna Russell og Rodney Baze. Russell er eldri og yfirvegaðari og hefur sætt við sig þau örlög sín að vinna í stálmyllunni í smábænum þeirra á meðan Rodney er órólegur og illa á sig kominn andlega eftir tvo herleiðangra til Írak. Ölvunarakstur Russells endar með banaslysi þannig að hann þarf að dúsa í fangelsi og á meðan sekkur bróðir hans djúpt ofan í ólöglega hnefaleika og safnar skuld hjá glæpamanni og bareiganda sem þó er besta skinn inn við beinið. Willem Dafoe leikur þennan náunga eins og honum einum er lagið og setur sinn sérstaka svip á myndina þótt hlutverkið sé lítið. Affleck er í ágætum yfirsnúningi sem litli bróðirnn en blóðið hreyfist varla í Bale, sem getur stundum verið óttalega litlaus og lullar hér með litlum tilþrifum í gegnum myndina þangað til hann fær að hrökkva í töffaragírinn og slá um sig með ofbeldi.

Casey suðar endalaust í Dafoe og fær hann að lokum til þess að koma sér í bardga á vegum snartjúllaðra sveitalubba sem svífast einskis. Á þeirra slóðum í fjöllunum er slegist með berum hnúum og látunum ekki linnt fyrr en annar keppandinn liggur í stöppu í jörðinni. Bale snýr ekki til baka úr þessu feigðarflani og þar sem lögreglan stendur getu- og áhugalaus andspænis sveitvarginum ákveður stóri bróðir að taka málin í sínar hendur.

Og þar mætir Bale Woody Harrelson sem er í banastuði sem leiðtogi skítalabbanna. Hann er hinn versti hrotti og eins og við má búast situr Woody vel í hlutverkinu og er í raun sá eini sem lætur til sín taka af einhverju viti í myndinni. Án hans væri Out of the Furnace alveg steingeld. Myndin tekur hressilega kippi í hvert skipti sem durgurinn sá skýtur upp kollinum og ógnin sem fylgir honum er áþreifanleg. Harlan DeGroat er maður sem þú vilt síður þurfa að eiga við.

Zoe Saldana og Forest Whitaker velkjast í hálfgerðu tilgangsleysi í smærri hlutverkum, hún sem fyrrverandi kærasta Russells sem fór frá honum þegar hann endaði í fangelsi og Whitaker sem núverandi kærasti hennar og löggan í bænum. Sá trausti og alltaf flotti, Sam Shepard, klikkar ekki í hlutverki frænda Russells sem leggur honum lið en fær ekki að njóta sín sem skyldi.

Með þennan mannskap og ágætis grunn að sögu hefði Out of the Furnace orðið að einhverju en Cooper missir tökin á þessu öllu og myndin fjarar út í eymdarlegt volæði þangað til rétt í lokin að henni er bjargað í horn með staðlaðri hefndarklisju.

Leikstjóri: Scott Cooper
Handrit: Brad Ingelsby, Scott Cooper
Leikarar: Christian Bale, Woody Harrelson, Casey Affleck, Zoe Saldana, Sam Shepard, Willem Dafoe, Forest Whitaker



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða