A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Outrage | Kvikmyndavefurinn Svarthöfði

Úr bunkanum: Outrage (2010)

14. nóvember '12 12:25 Outrage

„Ekki verður af Kitano tekið að það er stíll yfir Outrage en hún er gjörsamlega innihaldslaus og veldur endalausum vonbrigðum.“

Tvær yakuza-glæpafjölskyldur elda grátt silfur þegar undirstjórnandi annarrar fjöskyldunnar ætlar að auka umsvif sín til þess að ganga í augu höfuðs fjölskyldanna tveggja.

Takeshi Kitano eða Beat Takeshi hefur á síðustu tveimur áratugum haslað sér völl í japönskum kvikmyndum sem kóngur yakuza-glæpamynda. Það verður ekki af Kitano tekið að hann er fjölhæfur þar sem hann gengur iðulega í störf leikstjóra, handritshöfundar, framleiðanda, klippara og fer með aðalhlutverkið. Það er samt upp og ofan hvernig honum tekst til enda öll störfin sem hann tekur að sér umfangsmikil.

Það er eitthvað með virðingu, heiður, puttaskurð og kviðristur í yakuza-glæpamyndum sem heillar undirritaðann. Fyrri myndir Kitanos hafa svo sannalega staðið undir væntingum en hér hallar undan fæti. Söguþráðurinn í Outrage er ótrúlega þvældur og virðist einungis vera réttlæting á fjöldamorðum og ófrumlegum byssubardögum en annars stendur myndin í stað.

Leikurinn er rétt yfir meðallagi þar sem Kitano er með besta hlutverkið. Hér rétt eins og í Brother leikur hann þöglu sterku týpuna sem Eastwood á höfundarrétt á. Kitano er þekktur fyrir vægðarlaust ofbeldi og blóðsúthellingar og hvorugt skortir í Outrage. Hinsvegar virðist Kitano vera gjörsamlega hugmyndasnauður og þreyttur á endalausum aftökum þannig að furðulegar og kjánalegar aftökur taka við af þeim hefðbundnu.

Ekki verður af Kitano tekið að það er stíll yfir Outrage en hún er gjörsamlega innihaldslaus og veldur endalausum vonbrigðum.

Leikstjóri: Takeshi Kitano
Handrit: Takeshi Kitano
Leikarar: Takeshi Kitano, Kippei Shiina, Ryo Kase, Tomokazu Miura



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða