A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Prisoners | Kvikmyndavefurinn Svarthöfði

Í bíó: Prisoners (2013)

20. október '13 12:48 Prisoners

„Frábær frammistaða Jackmans, truflandi en heillandi og eftirminnileg saga gerir Prisoners eina af þeim betri sem hafa komið út á árinu.“

Tveimur ungum stúlkum er rænt í smábæ í Bandaríkjunum og þegar lögreglan kemst ekki til botns í málinu ákveður faðir annarar stúlkunnar að grípa til sinna ráða.

Leikstjórinn Denis Villeneuve vakti mikla athygli fyrir kvikmyndina stórgóðu Incendies sem byggir á samnefndu leikriti sem kallaðist Eldhaf þegar það var sett á svið í Borgarlekhúsinu. Prisoners er margslungin spennutryllir og vekur upp ýmsar spurningar. Rétt eins og í Incendies hefur Villeneuve traust tök á vandmeðförnum og kraftmiklum söguþræði í Prisoners og hefur valinn mann í hverju rúmi.

Aaron Guzikowski skrifar handritið en hann endurskrifaði Reykjavík-Rotterdam þeirra Arnalds Indriðasonar og Óskars Jónssonar sem Contraband. Brottnámi barna hefur áður verið gerð skil í nýlegum myndum á borð við Gone Baby Gone og Mystic River, og Prisoners deilir ýmisu með þeirri síðarnefndu.

Í myndinni gerist annar faðirinn, Keller Dover sem Hugh Jacman leikur, sjálfskipaður löggæslumaður og lætur ekkert stöðva sig í leitinni að telpunum tveimur. Vonleysi og reiði krefjast aðgerða og lausna og með ákvörðun sinni vinnur Dovers áhorfendur á sitt band. Og lætur okkur svo véfengja valið. Handrit Guzikowskis er virkilega vel heppað og smekklega útfært af Villeneuve. Látlaus en falleg myndataka Rogers Deakins fer myndinni mjög vel og tónlist Jóhanns Jóhannssonar er einkum áhrifarík og flott.

Jackman er virkilega sannfærandi í hlutverki smiðsins Dover, sem hefur tapað því dýrmætasta sem til er í heiminum. Jackman hefur sýnt og sannað með frammistöðu sinni í þessari og Les Misérables, að það er heilmikið í hann spunið. Í erfiðu atriði í myndinni þegar Dover hefur handsamað mann sem hann telur tengjast brotthvarfi stelpnanna, lætur hann höggin dynja á honum, í þeirri von að hann gefi sig og segi hvar stelpurnar eru niðurkomnar. Í vandaðri túlkun Jackman má finna fyrir þeirri gífurlegri angist og vonleysi sem persóna hans upplifir.

Jake Gyllenhaal fer með hlutverk lögreglumannsins sem rannsakar málið og dansar hann á mörkum þess að vera vandvirkur, hrokafullur og einfaldlega óþolandi, en samt sem áður góður í rullunni. Paul Dano er mjög yfirvegaður í sínu hlutverki og þótt best sé að segja sem minnst þá hryllir mann við persónu hans.

Prisoners er snjall og vel gerður spennutryllir með óvæntri flækju. Frábær frammistaða Jackmans, truflandi en heillandi og eftirminnileg saga gerir Prisoners eina af þeim betri sem hafa komið út á árinu. Í stigvaxandi atburðarás líkt og í þessari vilja áhorfendur öðlast sálarró yfir atburðum myndarinnar rétt eins og Dover, en einn hræðilegur atburður réttlætir ekki annan. Eða hvað?

Leikstjóri: Denis Villeneuve
Handrit: Aaron Guzikowski
Leikarar: Hugh Jackman, Jake Gyllenhaal, Viola Davis, Maria Bello, Terrence Howard, Melissa Leo, Paul Dano



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða