A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Side Effects | Kvikmyndavefurinn Svarthöfði

Í bíó: Side Effects (2013)

19. apríl '13 11:19 Side Effects

„Ekki verður af Soderbergh tekið að honum er margt til lista lagt og hann sýnir eina ferðina enn hvað í honum býr með Side Effects.“

Þegar eiginmaður Emily lýkur afplánun fangelsisdóms finnur hún fyrir kvíða og þunglyndi. Eftir misheppnaða tilraun til þess að valda sér skaða kemst hún undir læknishendur og innan skamms er hún komin á alls konar pillur sem hafa ýmsar aukaverkanir.

Leikstjórinn Steven Soderbergh hefur tilkynnt að Side Effects sé hans síðasta kvikmynd sem berst í kvikmyndahús. Þessi fjölbreytti og fjölhæfi leikstjóri ætlar að setjast í helgan stein. Soderbergh er í miklu uppáhaldi hjá undirrituðum sem telur Soderbergh vera jafnvígan á hvaða kvikmyndategund sem er. Hann er líka ekki aðeins þrælgóður leikstjóri þar sem hæfileikar hans liggja víðar en hann starfar einnig sem kvikmyndatökumaður mynda sinna auk þess sem hann klippir þær einnig þótt hann sinni þeim störfum undir dulnefnum á kreditlistum myndanna.

Í Side Effects vefur Soderbergh spennandi blekkingarvef í trylli sem stigmagnast eftir því sem á líður. Scott Z. Burns skrifar handritið og teflir fram persónum sem eru ekki allar þar sem þær eru séðar. Rooney Mara, Jude Law, Channing Tatum og Catherine Zeta-Jones mynda firnasterkan leikhóp þar sem Mara ber þó af. Persóna hennar er þungamiðja myndarinnar og hún er mjög sannfærandi í túlkun sinni á hinni þunglyndu og lífsleiðu Emily. Tatum kemur einnig sterkur inn í litlu en góðu hlutverki.

Ekki verður af Soderbergh tekið að honum er margt til lista lagt og hann sýnir eina ferðina enn hvað í honum býr með Side Effects. Í myndinni taka Burns og Soderberg á óheflaðri og ágengri markaðssetningu lyfjafyrirtækja á hinum ýmsu undralyfjum sem geta hafa þó oftar en ekki hliðarverkanir sem geta verið verri en meinið sem þau eiga að laga. Boðskap sínum flétta þeir fimlega saman við góðan spennutrylli þannig að fari svo að Soderbergh standi við stóru orðin þá er óhætt að segja að hann kveðji með stæl.

Leikstjóri: Steven Soderbergh
Handrit: Scott Z. Burns
Leikarar: Rooney Mara, Jude Law, Channing Tatum, Catherine Zeta-Jones



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða