A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Silver Linings Playbook | Kvikmyndavefurinn Svarthöfði

Í bíó: Silver Linings Playbook (2012)

29. nóvember '12 12:10 Silver Linings Playbook

„... það er ekki hægt að segja annað en að undirritaður hafi gengið ansi bjartsýnn úr bíóinu og út í kuldann. Silver Linings Playbook er ótrúlega fyndin og hugljúf mynd, og svo sannalega ein af bestu myndum ársins.“

Eftir að hafa dvalið á geðveikrahæli í átta mánuði snýr Pat aftur heim og ætlar að reyna vinna ástir fyrrverandi eiginkonu sinnar á ný. Líf hans er allt töluvert flóknara eftir þessa átta mánuði á hælinu en Pat stefnir ótrauður að því að koma því aftur í fyrra horf. En hlutirnir flækjast enn frekar þegar dularfull stúlka ryðst inn í líf hans.

Silver Linings Playbook tekur á reiði, depurð, vonleysi, vonbrigðum og væntingum. Einhverju sem fæstir komast hjá því að upplifa einhvern tíma á lífsleiðinni og stundum hellist þetta allt yfir á sama augnablikinu. David O. Russell leikstýrir þessari stórgóðu mynd og heldur því vandlega til haga að þrátt fyrir allt þá eigum við öll vonarglætu. Við getum annað hvort greitt úr flækjunum eða látið þær einfaldlega eiga sig.

Russell er öllum hnútum kunnugur í þessum efnum en síðast sendi hann frá sér hnefaleikamyndina The Fighter þar sem tekið var á svipaðan hátt á þeim væntingum sem við gerum okkur. Rétt eins og í henni nær Russell að draga fram það allra besta úr leikurum sínum í Silver Linings Playbook. Óþvingaður frásagnarmáti myndarinnar er einn helsti kostur hennar ásamt hrífandi leik, kostulegum uppákomum og tilgerðarlausum samtölum. Samskipti þessara tveggja brotnu einstaklinga, sem ná saman og bæta hvort annað upp, eru hughreistandi og einlæg.

Leikhópurinn eins og hann leggur sig sýnir verðlaunaleik með þau Bradley Cooper og Jennifer Lawrence í aðalhlutverkunum. Cooper er einstaklega óheflaður og hvatvís í hlutverki Pats sem ætlar sér að vera bjartsýnn og horfa áfram á veginn þrátt fyrir alla þá tálma sem eru í vegi hans. Lawrence leikur dömuna sem ryðst inn í líf Pats og verður honum jafnframt til bjargar. Lawrence sýnir einhverja bestu frammistöðu leikkonu á árinu og óhætt er að spá því að hún eigi eftir að raka saman tilnefningum og jafnvel einhverjum styttum á næstu mánuðum.

Robert De Niro hefur ekki átt sjö daganna sæla síðastliðin ár og hefur ekki einu sinni verið skugginn af sjálfum sér í síðustu myndum. Hér sýnir hann og sannar að hann sé ekki dauður úr öllum æðum og hefur sennilega ekki sýnt betri frammistöðu í ein fimmtán ár. Gamanleikarinn Chris Tucker lítur við í litlu hlutverki sem félagi Pats af hælinu og stendur sig vel.

Það er auðvelt að missa sjónar af heildarmyndinni og enn erfiðara að reyna að byrja upp á nýtt. Enska orðatiltækið „silver lining" stendur einfaldlega fyrir bjartsýni og það er ekki hægt að segja annað en að undirritaður hafi gengið ansi bjartsýnn úr bíóinu og út í kuldann. Silver Linings Playbook er ótrúlega fyndin og hugljúf mynd, og svo sannalega ein af bestu myndum ársins.

Leikstjóri: David O. Russell
Handrit: David O. Russell
Leikarar: Bradley Cooper, Jennifer Lawrence, Robert De Niro, Jacki Weaver, Chris Tucker



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða