A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Snabba cash | Kvikmyndavefurinn Svarthöfði

Úr bunkanum: Snabba cash (2010)

20. nóvember '12 16:20 Snabba cash

„Þrátt fyrir hressilegar ofbeldisgusur og spennnu sem magnast jafnt og þétt finnur maður óneitanlega aðeins fyrir lengd myndarinnar en á móti kemur að tíminn er notaður ágætlega til þess að kynna helstu persónur.“

Sænska glæpamyndin Snabba cash 2 var frumsýnd í Reykjavík um helgina sem gefur Svarthöfða kærkomið tilefni til þess að kippa Snabba cash frá 2010 úr bunkanum.

Norrænar glæpasögur hafa verið funheitar á síðustu árum og þar eru Svíar heldur betur frekir til fjörsins. Henning Mankell er búinn að vera á fleygiferð lengi, vinsældir Stieg heitins Larssons og Millenium-þríleiks hans voru yfirgengilegar og lögfræðingurinn Jens Lapidus kom sterkur inn  með glæpasögunni  Snabba cash (Fundið fé) sem sló í gegn í heimalandinu og rétt eins og með verk Larssons var henni snarað á hvíta tjaldið. Snabba cash er hörkufínn krimmi og renndi í kjölfar Millenium-þríleiksins stoðum undir þá staðreynd að Svíar eru að verða stórveldi í glæpamyndagerð.

 

Saga Lapidusar er margslungin og nokkuð flókinn og hefur eðlilega verið einfölduð töluvert í kvikmyndahandritinu. Þrátt  fyrir það er myndin nokkuð löng og snúin enda segir hér af býsna mörgum persónum sem lýstur saman í undirheimum Stokkhólms þar sem allir hlutaðeigendur deila sameiginlegum draumi um skjótfenginn gróða. Og svífast einskis til þess að ná markmiðum sínum.

Johan Westlund er fátækur dreifbýlisstrákur sem stundar nám í viðskiptafræði í Stokkhólmi. Hann er ansi klár og hangir með auðstrákum og reynir að falla í hópinn með því að klæða sig smart og spila sig kúl. Hann vinnur fyrir sér sem leigubílstjóri hjá vafasömum gaurum og er skyndilega kominn á kaf í eiturlyfjaviðskipti þeirra þar sem þekking hans á viðskiptum nýtist öllum vel. Hann kynnist strokufanganum Jorge í gegnum glæpaklíkuna og með þeim tekst nokkuð náin vinskapur sem síðar á eftir að reyna mikið á þegar serbneskir krimmar fara í stríð við leigubílabófana um risastóra dópsendingu.

JW áttar sig smám saman á því að í þessum leik eru engir bræður þegar hinn öflugi serbneski handrukkari Mrado bendir honum á að félagar hans eigi eftir að svíkja hann. JW stendur því taugaveiklaður á milli tveggja elda og fer eðlilega að efast um það hvort glæpir borgi sig yfirleitt.

Þrátt fyrir hressilegar ofbeldisgusur og spennnu sem magnast jafnt og þétt finnur maður óneitanlega aðeins fyrir lengd myndarinnar en á móti kemur að tíminn er notaður ágætlega til þess að kynna helstu persónur þannig að manni er einhvern veginn ekki sama um neina þeirra þótt allt séu þetta bölvuð úrþvætti og skepnur. En í það heila er Snabba cash virkilega vel gerð og áhugaverð glæpamynd.

 

Leikstjóri: Daniel Espinosa
Handrit:
Leikarar: Joel Kinnaman, Matias Padin Varela, Dragomir Mrsic, Lisa Henni



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða