A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Star Trek Into Darkness | Kvikmyndavefurinn Svarthöfði

Í bíó: Star Trek Into Darkness (2013)

11. maí '13 19:43 Star Trek Into Darkness

„Cumberbatch og persóna hans bæta upp það sem á vantar síðan síðast og fleyta Into Darkness langleiðina upp að Star Trek. Þannig að í raun er það skúrkurinn sem bjargar málunum. “

J.J. Abrams, klárasti bíónördinn í heiminum þessi misserin, sparkaði Star Trek-kvikmyndabálkinum í gang með miklum látum og stæl fyrir fjórum árum. Þá bjargaði Abrams Star Trek frá stöðnun hallærilslegheita og andleysis með slíkum glæsibrag að jafnvel áhorfendur sem áður höfðu takmarkaðan áhuga á fyrirbærinu yfirgáfu kvikmyndahúsin uppnumdir og æstir í meira.

Chris Pine og Zachary Quinto renndu sér áreynslulaust í uppfærðar útgáfur hinna goðsagnakenndu persóna Kirk og Spock og hristu af sér skugga Williams Shatner og Leonard Nimoy sem hafa í áratugi verið holdgervingar persónanna. Quinto fékk að vísu smá hjálp frá Nimoy sjálfum en Pine tókst að belgja sjálfsöryggi Kirks út þannig að það fyllti upp í það ginnungagap sem Shatner skildi eftir sig.

Abrams var því eðlilega undir gríðarlegri pressu þegar hann hófst handa við óhjákvæmilega framhaldsmyndina, Star Trek Into Darkness, enda síður en svo að því hlaupið að fylgja léttleikandi snilldinni frá 2009 eftir. Honum tekst þetta þó að mestu í nýju myndinni. Into Darkness er ekki alveg jafn áhrifarík og grípandi og Star Trek en Abrams er þó aðeins hársbreidd frá því að skila jafnoka Star Trek anno 2009.

Abrams frískaði hressilega upp á gamalkunnugur persónurnar sem Gene Roddenberry kynnti til leiks í sjónvarpi 1966 og kom bakgrunni þeirra og innbyrðis samböndum léttleikandi til skila í fyrstu myndinni. Grunnurinn hefur því verið vandlega lagður og Abrams dempir sér beint í hörku Raiders of the Lost Ark-hasar í upphafi. Síðan er varla slegið af þannig að ekkert vantar upp á fjörið og spennuna í Into Darkness sem er alls ekki neitt sérstaklega myrk heldur lífleg og hressandi.

Myndinni er skipt bróðurlega á milli Kirks og Spocks sem fá báðir skemmtileg og flott tækifæri til að láta ljós sitt skína og sem fyrr er ágreiningur og núningur milli þessara mjög svo ólíku félaga helsti burðarásinn. Og báðir þroskast þeir og læra hvor af öðrum eins og vera ber. Zoe Saldana heldur uppi heiðri kvenna í ævintýrinu og gefur körlunum ekki þumlung eftir auk þess sem nýliðinn Alice Eve réttir kynjahlutföllin aðeins í hlutverki Dr. Carol Marcus.

Þá er ánægjulegt að sjá gamla Robocop-jaxlinn Peter Weller í hlutverki aðmíráls Stjörnuflotans. Hann er enn hörkutól þótt árin hafi færst yfir. Simon Pegg leikur sér síðan sem fyrr að því að létta stemninguna með nöldurgríni sínu í hlutverki Scottys.

Vísanir í Star Trek, bæði í sjónvarpi og bíó, eru þarna síðan út um allar trissur til þess að gleðja eða hrella heittrúaða Trekkara, allt eftir því hvernig á það er litið, þannig að dæmið gengur nánast fullkomlega upp og Abrams skilur við áhorfendur í sjötta himni frekar en sjöunda eins og 2009.

Að þeim Kirk og Spock ólöstuðum er þó Benedict Cumberbatch aðal gæinn í þessari mynd sem hryðjuverkamaðurinn og svikarinn John Harrison. Sá er vægast sagt skæður andstæðingur, útsmoginn og klár þannig að vitringurinn Spock má hafa sig allan við. Og til að bæta gráu ofan á svart er hann eins manns herdeild og alger ofjarl Kirks þegar kemur að slagsmálum og skotbardögum. Cumberbatch skilar þessum ísklada skúrki með svo mikilli fágun og grimmd að maður getur eiginlega ekki stillt sig um að halda með honum. Hér stígur fram eitthvert eitraðasta og ómótstæðilegasta illmenni sem lengi hefur sést í bíó.

Star Trek Into Darkness byrjar með látum og miklu stuði en um miðbik myndar hikstar Enterprise aðeins og maður óttast á tímabili að Abrams ætli að klúðra eftirfylgninni en þá hrekkur myndin beint í fimmta gír og lokakaflinn keyrir áfram á spennu og miklum tilfinningum þar sem hinn fljórfæri Kirk og tilfinningadofni og rökfasti Spock glíma við ofurefli gáfna og aflsmuna óvinarins. Cumberbatch og persóna hans bæta upp það sem á vantar síðan síðast og fleyta Into Darkness langleiðina upp að Star Trek. Þannig að í raun er það skúrkurinn sem bjargar málunum.

Eins og alheimurinn veit snýr Abrams sér næst að því að lífga Star Wars við. Eðlilega kannski þar sem maðurinn er Star Wars-nörd af Máttarins náð og það er ekki síst sterk Stjörnustríðstaug hans sem hefur lífgað upp á Trekkið. Fari svo að Abrams snúi ekki aftur til þess að gera þriðju Star Trek-myndina þá skilur hann í það minnsta svo vel við bálkinn og persónurnar að það verður hægur vandi fyrir gott fólk að taka við keflinu og fara með Spock, Kirk og félaga upplitsdjörf á ókannaðar slóðir þar sem enginn maður hefur áður komið.

Leikstjóri: J.J. Abrams
Handrit: Roberto Orci, Alex Kurtzman, Damon Lindelof
Leikarar: Chris Pine, Zachary Quinto, Benedict Cumberbatch, Karl Urban, John Cho, Zoe Saldana, Simon Pegg, Anton Yelchin, Alice Eve, Peter Weller



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða