A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

The Amazing Spider-Man 2 | Kvikmyndavefurinn Svarthöfði

Í bíó: The Amazing Spider-Man 2 (2014)

26. apríl '14 18:03 The Amazing Spider-Man 2

„Á meðan Spider-Man puðar við að taka Electro úr sambandi stefnir gamall og góður vinur hans, Harry Osborne, hraðbyri til sturlunar með hjálp áfengis og óhóflegs hroka. Það stefnir því allt í voða og þeir sem þekkja sögu Lóa vita hvað bíður handan við hornið.“

Einhvern veginn hljómaði það hálf galið að endurræsa Spider-Man með nýrri mynd 2012 þar sem stutt var síðan Sam Raimi skilaði ágætum þríleik um þessa unglingaveiku ofurhetju. Raimi gerði stormandi lukku með Spider-Man 2002 þar sem Tobey Maguire lék Lóa. Raimi hélt góðum dampi tveimur árum síðar í Spider-Man 2 en glutraði fjörinu niður í þriðju myndinni 2007 þar sem of mörg illmenni og þvæld sagan báru myndina ofurliði. Samt sem áður, í það heila tekið, var þetta fínn bálkur.

Þvert ofan í hrakspár og úrtölur hristi leikstjórinn Marc Webb fram prýðilega mynd um Köngulóarmanninn 2012 og tefldi Andrew Garfield fram sem miklu geðþekkari og hressari Spider-Man/Peter Parker en Maguire bauð upp á nokkrum árum áður. Í nýju myndinni var Mary Jane, kærasta Peters sem Kirsten Dunst lék á móti Maguire, fjarri góðu gamni og áherslan var á fyrstu kærustu Peters, Gwen Stacy sem Emma Stone gerði góð skil.

Emma er ofboðslega sjarmerandi leikkona en fær sem betur fer meira að gera en vera bara krúttlegt ástarviðfang Lóa. Gwen er dóttir hins gallharða lögreglustjóra Captain Stacy og lætur sér sem betur fer ekki duga að vera bara „sæta stelpan“. Emma fær að vísu skammarlega lítið að gera framan af í þessari mynd en þetta hlýtur að sleppa í gegnum Bechdel-prófið þegar hún fær loksins tækifæri til þess að vera nútímakona og taka málin í sínar hendur. Koan fær í það minnsta að vera smá hetja í myndinni og hafa áhrif á atburðarásina og standa upp í hárinu á karlpungunum sem gera sig breiða á tjaldinu.

Webb snýr semsagt aftur ásamt þeim Peter og Gwen í ágætis framhaldi sem gefur þó fyrri myndinni aðeins eftir. Aðallega vegna þess að miklum tíma er eytt í að hlaða undir forsögu Peters og leit hans að sannleikanum um hvað varð um foreldra hans sem yfirgáfu hann ungan og komu fyrir í fóstri hjá Ben frænda og May frænku. Myndin byrjar með látum en síðan er flókin sagan þar sem fjölmargar persónur koma að málum spunninn, frekar hægt, þannig að myndin teygir sig yfir tvær klukkustundir og tuttugu mínútur. Og því miður finnur maður aðeins fyrir lengdinni. Allt á þetta samt rétt á sér og þarna falla nokkur mikilvæg púsl á sinn stað og gefa heildarsögunni ákveðna fyllingu.

Jamie Foxx leikur minnipokamanninn Max Dillon, komplexaðan rugludall sem vinnur vanþakklátt starf hjá hinu grunsamlega risafyrirtæki Oscorp. Vinnuslys breytir honum í hinn rafmagnaða ofurskúrk Electro. Í grunninn er Dillon besta skinn en niðurbæld og uppsöfnuð gremja og höfnunartilfinning virkja hann til illra verka. Á meðan Spider-Man puðar við að taka Electro úr sambandi stefnir gamall og góður vinur hans, Harry Osborne, hraðbyri til sturlunar með hjálp áfengis og óhóflegs hroka. Það stefnir því allt í voða og þeir sem þekkja sögu Lóa vita hvað bíður handan við hornið. Webb tekst þó sem betur fer að stýra fram hjá þeim hörmungum sem Raimi lenti í með Spider-Man 3 þegar hann reyndi að halda of mörgum skúrkum á lofti í einu. Hérna virkar þetta bara assgoti vel.

Foxx er ágætur sem lúðinn Dillon en er í besta falli hallærsilegur þegar hann umbreytist í bláa rafmagnsklikkhausinn Electro. Hálf eitthvað asnalegur og kraftlítill skúrkur. Það breytir því þó ekki að þegar Electro fær hvatningu og hjálp úr réttri átt æsast leikar til muna, myndin hrekkur aftur í gang og dæmið er klárað með heilmikilli flugeldasýningu og tilkomumiklum þrívíðum loftfimleikum Köngulóarmannsins þannig að spennan heldur út seinni hálfleik.

Allt er þetta kryddað með ást, dramatík og tilfinningalegum hápunkti sem lætur mann nú ekki alveg ósnortinn. Endirinn er síðan vandlega tengdur inn í næstu mynd og miðað við þær vísbendingar sem við fáum núna má vel hlakka til framhaldsins enda hefur þessi langi millikafli komið það miklum upplýsingum til skila að ekkert ætti að vera því til fyrirstöðu að gera allt kolbrjálað í næstu mynd.

Leikstjóri: Marc Webb
Handrit: Alex Kurtzman, Roberto Orci, Jeff Pinkner
Leikarar: Andrew Garfield, Emma Stone, Jamie Foxx, Dane DeHaan, Paul Giamatti, Sally Field



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða