A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

The Hangover Part III | Kvikmyndavefurinn Svarthöfði

Í bíó: The Hangover Part III (2013)

3. júní '13 14:54 The Hangover Part III

„The Hangover Part III þjáist af töluverðu tilgangsleysi og tómahljóðið glymur hátt. Sagan er ómerkileg moðsuða en sem betur fer má samt hafa dálítið gaman að þessu og stöku góðir brandarar dúkka upp...“

Jæja. Eigum við að nenna að rekja söguþráð þriðju Hangover-myndarinnar, ef söguþráð skildi kalla? Fjórmenningarnir Phil, Stu, Alan og Doug hafa ýmsar fjörurnar sopið með tilheyrandi timburmönnum og skelfilegum afleiðingum sem oftast má rekja til hálfbjánans Alans sem hinir þrír sitja uppi með vegna þess að hann er mágur Dougs. Doug hefur að vísu haft ríka tilhneigingu til þess að týnast eða hverfa í upphafi svaðilfara hópsins, sem hingað til hefur gert allt vitlaust í Las Vegas og á Tælandi. Að þessu sinni er honum rænt og sem fyrr eru það hinir þrír sem djöflast og djóka sig í gegnum myndina til þess að bjarga aumingja Dough sem virðist alltaf vera rangur maður á röngum stað á bandvitlausum tíma.

Nú er ferðinni heitið til Arizona þar sem hugmyndin er að koma hinum geðbilaða Alan í meðferð en hann er í raun barn fast í sverum og fúlskeggjuðum líkama Zach Galifianakis. Þeir komast þó ekki langt þar sem glæpaforingi, sem John Goodman leikur, rænir Dough og hótar að drepa hann ef hinir þrír finni ekki erkifíflið Mr. Chow.

Mr. Chow þessi var þokkalega sniðugur í fyrstu myndinni þar sem hann stökk nakin upp úr farangursgeymslu bifreiðar en síðan þá hefur hann verið plága á vinunum og er núna kominn fast að því að vera með öllu óþolandi. Eltingarleikurinn berst til Mexíkó og þaðan á byrjunarreitin í lastabælinu Las Vegas.

The Hangover var helvíti góð gamanmynd. Alger steypa en drepfyndin. The Hangover Part II olli því miklum vonbrigðum enda lítið gert nema endurtaka fyrstu myndina nema sagan var færð til Asíu. Átakanlega ófyndin mynd sem mér hefur tekist að þurrka svo rækilega úr minni mínu að ég man ekki eitt einasta atriði úr henni. Annar hluti hefði því endilega mátt vera endapunkturinn en hópurinn sem stendur að Úlfagenginu ákvað að kreista síðustu dropana úr útvötnuðu hræinu.

The Hangover Part III þjáist, í ljósi þessa, af töluverðu tilgangsleysi og tómahljóðið glymur hátt. Sagan er ómerkileg moðsuða en sem betur fer má samt hafa dálítið gaman að þessu og stöku góðir brandarar dúkka upp og þá einna helst fyrir tilstuðlan Ed Helms og Galifianakis sem eru enn í sama gír og í fyrstu myndinni.

Bradley Cooper er hins vegar greinilega orðinn allt of góður fyrir svona dellu. Hann var glettilega sjarmerandi sem hinn kærulausi Phil í byrjun en er eins og illa gerður hlutur þarna núna, litlaus, þurr og leiðinlegur. Óskarstilnefning hans fyrir Silver Linings Playbook og fjöldi spennandi tilboða í kjölfarið ættu líka að hafa tryggð honum öryggi frá dellumyndum eins og þessari í bili. Sá magnaði senuþjófur John Goodman nær ekki einu sinni flugi í hlutverki sínu og bjargar engu. Mr. Chow er býsna plássfrekur og smekkur fólks á því skoffíni getur hæglega ráðið úrslitum um hvernig myndin legst í það.

The Hangover Part III tekur ekki spretti en á nokkur augnablik þar sem hægt er að brosa eða jafnvel hlæja. Hún er betri en miðkaflinn en enginn hefði samt saknað þess ef hún hefði aldrei verið gerð.

Leikstjóri: Todd Phillips
Handrit: Todd Phillips, Craig Mazin
Leikarar: Bradley Cooper, Ed Helms, Zach Galifianakis, Justin Bartha, Ken Jeong, John Goodman, Jeffrey Tambor, Heather Graham, Melissa McCarthy, Mike Epps



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða