A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

The Purge | Kvikmyndavefurinn Svarthöfði

Í bíó: The Purge (2013)

1. júlí '13 11:31 The Purge

„Eini kosturinn við myndina er að ef fólk er í stuði fyrir pælingar þá vekur hún upp siðferðilegar spurningar en það er alveg undir hverjum og einum komið hversu lengi þeir geta dundað sér við eigin hugsanir á meðan dellan á tjaldinu gengur yfir.“

Það er víðar en á Íslandi sem stjórnvöld frá geggjaðar hugmyndir til þess að bjarga glötuðu ástandi og rétta vonlausan efnahag af. The Purge gerist árið 2022 og þá hefur verið krukkað hressilega í stjórnarskrá Bandaríkjanna og traustatökum verið náð á hárri glæpatíðini og erfiðri kreppu með þeirri einföldu aðgerð að gera alla glæpi löglega í tólf klukkustundir einu sinni á ári.

Þetta úrræði minnir um margt á samfélagsbæturnar í Hungurleikunum og svínvirkar. Glæpatíðni er í algeru lágmarki, fyrir utan þessa einu nótt þegar allt er leyfilegt, og efnahagurinn hefur tekið stórkostlegum breytingum. Ekki síst vegna þess að þeir sem helst eru drepnir þessa hungurnótt eru fátækir og þeir sem standa höllum fæti í lífinu. Hinir ríku fara spenntir inn í nóttina, öruggir í ramgerðum húsum sínum í afgirtum millahverfunum. Til þess að lýsa stuðningi við hreinsunina, eða "the purge" eins og fyrirbærið er kallað, setur fína fólkið blá blóm fyrir utan hús sín, fær sér svo smá rautt í glas og fylgist í notalegri teboðsstemningu með fréttum af óöldinni og slátruninni.

Sá frekar þreytandi leikari Ethan Hawke leikur vel stæðan fjölskylduföður sem hefur auðgast vel á að selja öryggiskerfi fyrir heimili þeirra efnameiri. Hann er að vonum fylgjandi hreinsuninni og sér fram á rólega nótt, ásamt eiginkonu og tveimur börnum, innan vígveggja heimilisins. Þetta breytist snarlega þegar hópur grímuklæddra unglingsuppa í drápshug herjar á heimilið og fjölskyldan margklofnar í afstöðu sinni til þess hvernig bregðast skuli við árásinni. Er hægt að réttlæta mannfórn einhvers utanaðkomandi til þess að vernda heildina?

Ég átta mig eiginlega ekki á því hvort hugmyndin að baki The Purge sé í grunninn góð eða ekki en það er alveg á hreinu að úrvinnslan er fyrir neðan allar hellur. Myndin er stutt og nær samt hvorki að halda spennu né þræði til enda. Einhvern veginn var maður búinn að gíra sig upp fyrir góðan hroll en hann kemur aldrei.

Leikstjórinn og handritshöfundurinn James DeMonaco hefur hérna hrært saman í drullumall A Clockwork Orange, Assault on Precinct 13 og Straw Dogs en nær ekki neinu fram af því sem þær ólíku myndir gera. The Purge er átakanlega fyrirsjáanleg og ljóst má vera að enginn í fjölskyldu Hawke hefur horft á Scream þar sem allir meðlimir hegða sér gegnumsneitt eins og fávitar og eru úr öllum takti við aðstæður sínar.

Eini kosturinn við myndina er að ef fólk er í stuði fyrir pælingar þá vekur hún upp siðferðilegar spurningar en það er alveg undir hverjum og einum komið hversu lengi þeir geta dundað sér við eigin hugsanir á meðan dellan á tjaldinu gengur yfir.

The Purge er ekki spennandi, hún er ekki ógnvekjandi og hún er ekki einu sinni ógeðsleg. Í raun hálfgerð vörusvik.

Leikstjóri: James DeMonaco
Handrit: James DeMonaco
Leikarar: Ethan Hawke, Lena Headey, Max Burkholder



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða