A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

Tillsammans | Kvikmyndavefurinn Svarthöfði

Úr bunkanum: Tillsammans (2000)

5. september '13 00:00 Tillsammans

„Yrkisefni Moodysons í Tilsammans er ekki jafn skelfilegt og síðar í Lilya 4-Ever og Ett hål i mitt hjärta en sýnir að leikstjórinn hefur einstakt lag á því að hreyfa við tilfinningum fólks, óháð því hvort hann gerir út á fegurð eða ljótleika. “

Sænski leikstjórinn Lukas Moodysson verður einn heiðursgesta á Alþjóðlegu kvikmyndahátíðinni í Reykjavík sem verður haldin í tíunda sinn síðar í þessum mánuði. Moodysson vakti fyrst athygli með þeirri stórgóðu Fucking Amal, hreyfði hressilega við áhorfendum með hinni átakanlegu mansalsmynd Lilya 4-Ever og gekk framaf fólki með hinni yfirgengilega óhugnanlegu Ett hål i mitt hjärta en þar barði hann á klámbransanum svo um munaði.

Hin yndislega fallega Tilsammans er sjálfsagt aðgengilegasta mynd Moodysons, enda alveg frábær sýn á horfinn heim sakleysiss og hippahugsjóna. Yrkisefni Moodysons í Tilsammans er ekki jafn skelfilegt og síðar í  Lilya 4-Ever og Ett hål i mitt hjärta en sýnir að leikstjórinn hefur einstakt lag á því að hreyfa við tilfinningum fólks, óháð því hvort hann gerir út á fegurð eða ljótleika. Það er því alveg kjörið að kippa Tillsammans úr bunkanum í tilefni af væntanlegri heimsókn leikstjórans.

Tillsammans segir frá Elisabeth sem flýr drykkju og barsmíðar eiginmannsins í hippakommúnuna Tillsammans. Í Tillsammans búa allar helstu hippatýpurnar (vonandi vel ýktar... og þó?) og Elisabeth og börnin hennar tvö kynnast innantómum pælingum um hvort Lína Langsokkur sé illur kapítalisti, hvort lífið sé hafragrautur og svo framvegis. Elisabeth kann bara býsna vel við sig í kommúnunni, prufar hugleiðslu og hættir að raka sig undir höndunum, en börnin eiga ekki jafngott með að sætta sig við vistina en þegar upp er staðið gerir hún öllum gott.

Tillsammans er bráðskemmtileg „fílgúdd“ mynd sem sækir styrk sinn í litríkar persónur, svartan húmor og sniðugt handrit. Allt þetta skilar sér svo í ljúfsárri mynd sem upphefur eiginlega hippana með því að gera grín að þeim og þrátt fyrir að persónurnar, hippar eða ekki hippar, hafi málað sig mismikið út í horn virðast allir eiga möguleika á því að njóta þess að vera til. Dásamlegt lokaatriðið neglir þennan punkt niður við undirleik ABBA og tekur af allan vafa um að maður þarf ekki láta lífið flækjast svo mikið fyrir sér, það er hvort eð er bara hafragrautur - meira að segja býsna góður hafragrautur þegar vel er að gáð.

Allir hafa gott af því að horfa á Tillsammans. Ekki síst visnuð blómabörn sem ættu að geta skemmt sér konunglega yfir spéspeglinum sem brugðið er upp fyrir framan þau. Þetta var náttúrlega kostulegur tími sem verður einhvern veginn ómótstæðilegur í endurliti frá sturluðum samtímanum en samt er eiginlega stórkostlegt að við sem vorum börn á þessum árum séum ekki öll Klepptæk í dag, þótt ekki væri nema bara fyrir fötin og gleraugun.

 

Leikstjóri: Lukas Moodysson
Handrit: Lukas Moodysson
Leikarar: Lisa Lindgren, Michael Nyqvist, Emma Samuelsson



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða