A PHP Error was encountered

Severity: Notice

Message: Only variable references should be returned by reference

Filename: core/Common.php

Line Number: 257

We're the Millers | Kvikmyndavefurinn Svarthöfði

Í bíó: We're the Millers (2013)

15. ágúst '13 14:26 We're the Millers

„Hér er áherslan á groddalegan og mátulega klúran húmor þannig að ef fólk er rétt gírað og býst ekki við of miklu býður þess fín kvöldskemmtun með Miller-fólkinu.“

Jason Sudeikis leikur David Clark, gamalreyndan fíkniefnasala sem státar af því að höndla með besta grasið í Denver. Hann er kærulaus leppalúði og nettur bjáni og tekst fyrir klaufaskap að láta einhverja ræfla ræna sig aleigunni og umtalsverðu magni af grasi. Þetta kemur honum í vond mál gagnvart heildsalanum sem gæti jafnvel hugsað sér að láta kála honum ef hann bætir ekki tjónið. David fær þann afarkost að fara í smá skreppitúr til Mexíkó og sækja þar smáræðissmotterí (les: heilan haug) af úrvals dópi og koma því til Bandaríkjanna. Og núlla þannig skuld sína.

Hann slær til og ákveður að dubba sig upp sem fjölskyldumann á ferðalagi á húsbíl og breiða þannig yfir raunverulegan tilgang ferðarinnar. Til þess að þetta gangi upp vantar hann auðvitað fjölskyldu og leysir það með því að fá nágrannakonu sína, fatafelluna Rose (Jennifer Aniston), til þess að látast vera eiginkona hans. Annar nágranni hans, fast að því greindarskertur, fær hlutverk sonarins og kjaftfor götustelpa lætur til leiðast og bregður sér í gervi dóttur þeirra „hjóna“.

Þetta föruneyti er býsna skrautlegt og býður upp á alls konar rugl og vitleysu sem leikararnir fjórir ná að steypa heilmikið úr. Sudeikis er í góðum gír, Will Poulter er senuþjófur í hlutverki reynslulausa og einlæga nágrannans Kenny og Emma Roberts skautar léttilega á milli þess að vera óþolandi uppreisnargelgja og efnileg og hjartahlý dóttir þeirra gervihjóna. Jennifer Aniston er svo barasta í ágætu grínstuði og gerir fatafellunni með gullhjartað góð skil. Hún strippar líka af mikilli íþrótt í mátulega tilgangslausu atriði sem á líklega öðrum þræði að skola af henni slykju Rachel Green úr Friends en henni gengur illa að losa sig undan sínu þekktasta hlutverki og Rose er í raun óttaleg Rachel. Sem kemur svo sem ekkert að sök.

We're the Millers er óttaleg þvæla, eiginlega bara runa af fáránlegum, fyndnum og vandræðalegum uppákomum innan losaralegs ramma sögunnar. Þessi grautur virkar samt sem áður alveg ágætlega og oft má hlæja að fávitaganginum og þá er væntanlega tilgangi myndarinnar náð og líklega er hér á ferðinni skásta gamanmyndin það sem af er þessu sumri. Þá er blessunarlega lítið um ameríska væmni og glassúrhúð sem oftast er dengt yfir myndir af þessu tagi. Hér er áherslan á groddalegan og mátulega klúran húmor þannig að ef fólk er rétt gírað og býst ekki við of miklu býður þess fín kvöldskemmtun með Miller-fólkinu.

Leikstjóri: Rawson Marshall Thurber
Handrit: Bob Fisher, Steve Faber, Sean Anders, John Morris
Leikarar: Jennifer Aniston, Jason Sudeikis, Will Poulter, Emma Roberts, Ed Helms



Svarthöfði 2011-2013 - Allur réttur áskilinn | svarthofdi (hjá) svarthofdi.is | Um Svarthöfða